【曾智华专栏】必定不欢而散

世情之中，好多事根本唔使水晶球，都可准确预测到结果。哈哈，若果小弟贴马有咁准就发大达。
　　
讲紧乜？正是前晚与大群江湖好友团年，当然人人讲八卦话题啦，当中之一，为非常好奇问：“碌Sir，你点睇港台同无记个‘香港金曲擘面玩完’事件呀？”
　　
根据小弟N次经验，呢类两家或多家机构携手做的颁奖典礼，多数一系出唔到闸，一系出闸脱脚，一系呢⋯⋯必定玩一次即散Band，无一例外，因这乃先天性的宿命！
　　
点解数十年来，几个电子传媒机构，以至印刷传媒搞乐坛颁奖礼，都会“潮州音乐”式，“自己顾自己”搞呢？简单：一、个个都想做大佬话晒事，咁又点能够行埋一齐？二、个个机构文化及品味皆不同，捧歌手、乐队取向不同，例如你喜欢达明一派，我喜欢Beyond；你谷王菲，我谷蔡琴；你认为卢冠廷够特色，我就觉得郑少秋、罗文最家喻户晓⋯⋯真系大缆都扯唔埋。
　　
香港电台搞《十大中文金曲》，已有四十几年历史，当然有自己深厚文化、制度及看法。
　　
TVB呢，做咗霸主咁多年，虽然如今少少弱鸡，但仍百分百以“一哥”心态出现，我想捧边个就捧边个！
　　
两个大台起初谂住“双剑合璧”，然后携手独步天下，唔系唔得，但要一条心囉，如今变咗一镬泡！
　　
因为两家大台音乐组决策人，一到埋枱倾，咁……理所当然矛盾浮现。无记在商言商，当然有好多这样那样的考虑，难道会心甘情愿益其他竞争对手？
　　
香港电台又如何，虽冇钱银需要考虑，但总有自己的立场及倾向。
　　
结果可能是你的“公平”变成我的“毒药”，最终当然散档！