【曾智华专栏】你的地狱我的天堂

童年读书时，已经常接触比对性句子，例如：你的蜜糖，我的毒药；你的噪音，我的音乐；你的美酒，我的砒霜⋯⋯

当然，行过不少人生路后，小弟也有真实体验，是——你的地狱，我的天堂！

上周本报马经权威张福元老哥在专栏呻——地狱赛期备课仓卒。讲乜？正是已到年尾，今晚跑完，周六又跑（年三十），然后下周二再跑（年初三）。七日跑三次马，当中夹着四日假期，行内皆知，印刷业及报业工作者，凡年尾多会休息，除新闻外，所有版面都要赶赶赶，赶在新年前交足稿，于是人人赶到裙拉裤甩（当然包括专栏版！）。

喂，马经版又如何？七日跑三次，员工当然呻到树叶都落！故此，张福元老哥称之为“地狱赛程”。为要迁就各方持份者，马会年廿九为年初三的十一场赛事排位。如此，就算你叻到会飞，都冇可能刨晒所有出赛马，因实在太吃力，也不可能提供有水平的分析。站在评马业及报业讲，当然绝不理想！

不过咁，站在马迷立场又完全唔同睇法噃。众所周知，马迷大部分为男性，兼且以上年纪者居多，大佬呀，由年三十到年初四，共有五日假期，真系闷到想死㗎！

如今疫情未全散，上门拜年可免则免，搓麻将也大大减少。老友晚饭又唔系几妥，因过年始终与亲人同过最好。

咁屈喺屋企五日，好易家嘈屋闭噃。呢呢，若有两日跑马就掂晒。一支公躲埋刨呀刨，到跑时直播又嗌呀嗌，简直是新年假期的“天堂消遣”。张福元老兄，张就吓啦，唔该！

今晚又有得玩！最好睇三班跑一千米！

“华丽活力”乃潘顿私家马，必去！脚拖“加州得力”及“靓虾女”。