【曾智华专栏】港铁快开电子票班

早上的茶记，是最佳蒐集草根民意地方。个个阿哥阿姐阿叔阿婶阿公阿婆都擘大喉咙，唔啱就喷，毫不避忌，当中有的非常偏激自私或情绪化，但也有合情合理的。
　　
上周五早上七点半踏入茶记，人声嘈杂，好似扯晒火咁，原来讲紧高铁通车，似乎班长者好多不满。萍姐素来率直，有𠮶句喷𠮶句，好㷫：“逼人上网是今时今日毫无同理心嘅政策，必须一律遵守，已成恶例。我哋班老嘢，唔识上网咩，咁就去上吊啦（哗！使唔使感激啊？）。究竟港铁有冇少少良心㗎，我点识上网呀？”
　　
肥叔：“萍姐，几十岁人咪咁劳气，你有血压高㗎！不过，真系弊，香港有超过二百万长者，究竟港铁有冇做过调查，有几多个唔识上网，又或Download Apps㗎？单单我识班老坑，真系十个冇三个识！用智能手机都系靠孙仔逐样教。人老学嘢慢，点搞？”
　　
崔伯乃知识分子，比较理性：“各位，上网、用手机、电子化系一去不返大潮流，大家愿唔愿都要接受！不过，受还受，揸权𠮶班都要知道民情㗎，点解唔用多啲时间、多啲人手、多啲耐性，先教晓长者点买电子票才实施呢？仲有，你点可以奉旨认为佢哋识个乜乜12306网站㗎？不少连网上填嘢都唔识，真系求救无门！”
　　
究竟呢类草根长者的民意，有冇机会去到港铁管理层耳中呢？港铁阿头个个精英，处理大小事务都用手机，必定认为一切是“手板眼见工夫”Easy Job，“正常人冇理由唔识嘅”！
　　
听听下，老友高佬强传来漫画，为大队无助长者，揸住个手机去庙街好似求签咁等“睇相佬”专家逐一教点买电子票。
　　
睇完，真系唔知好嬲定好笑！