星8卦｜太太罗美薇神隐廿年 揭张学友狂推job之谜

娱乐圈特别多渣男荡女，但好男人好老窦好彩都仲有，张学友都可以说位列三甲。好男人形象非常贯彻，出道绯闻几乎零，学友是罗美薇（MayMay）的初恋，虽然话初恋多数不得善终，但拍拖多年无风无浪，到96年二人顺理成章拉埋天窗，成为当时佳话，良缘天定，婚后学友顾家揾食之责一人揹起，MayMay就安心照顾家庭做全职主妇。

除了好老公更是好老窦，自从大女瑶华01年出世后，学友已经减少幕前演出，4年后迎来幼女瑶萱，学友索性将所有工作都推晒，有几年直情无晒影，唔讲以为佢提早退休。

学友一向系圈中廿四孝老窦。

点解学友要半退休，原来系为了专心凑女，原因唔系请唔起工人，只系佢唔想错过咗两个女成长期，怕将来就后悔莫及追唔番，两个女喺香港读书，学友日日做柴可夫，送返学接放学，全程自己跟到足，咁多年好少见老婆踪影，系因为做咗张太后，MayMay真系唔想再喺闪光灯下出现，每次送女阿妈都将自己收埋，拉晒窗帘。

七人车后面，两公婆夹到绝，非常成功避开传媒视线，后来夫妇二人决定送两个女去英国寄宿，学友呢位视两个女系前世情人嘅绝种好爸，每个星期都会飞一次伦敦，仲要系民航机，舟车劳动，等两个女知道老窦任何时候都stand by照顾佢哋，如是者学友一年搭几十次长途机，谂起可以见到两个心肝宝贝，完全唔当苦差，非常自得其乐，所以𠮶几年学友忙到癫，系因为个个星期要飞。

后来两个女儿唔适应外国生活，学友第一时间接两位千金回港，继续日日做柴可夫，接送阿女出入。所以瑶华瑶萱两姊妹同老窦感情好到不得了。身边朋友成日笑学友，因为两个女跟老婆饼印般，尤其大女瑶华，学友一定系超级爱MayMay，三个女人已经系佢一生。