星8卦｜“孝哥”纵容烂赌老婆输身家 妻债夫还挨到病

做咗电视台30年先转去做电影？好多人都问我点解，咪因为一个字“穷”囉！鬼叫我老公揾钱唔够多咩，不过，有钱都未必系件好事，㖊晚食饭大家先讲起阿“老前辈”仍然要出嚟挨，成日见到佢，因为老婆生前欠落一身赌债，过身后成条数过晒落“老前辈”身上，加上班仔女唔生牲，唔揾食就无钱过日子，睇见都心酸。

估唔到“老前辈”后继有人，圈中被一致认为“廿四孝老公”的孝哥，后生时情路坎坷，又结又离唔经唔觉已经娶咗3个老婆。有名你叫孝哥，佢人品真系不错，同第二任老婆出问题，系因为一直坚持对第一任照顾，个个月畀赡养费，连对方的新男友都帮手养埋，终于令当时老婆睇唔过眼，日嘈夜嘈终于分手收场。

现在即系第三任“孝嫂”样靓身材正，重点系好旺孝哥，婚后令佢事业渐进佳境，而孝嫂一直希望老公揾多啲钱，同一班阿太走得好埋，太太团靠打牌联谊，但牌技又唔叻，孝嫂输埋输埋都输咗半层楼。

阿太们又教孝嫂投资，买基金买股票，其实孝嫂好认真，认咗其中一位阿太做师父，眼见孝哥日挨夜挨只系揾有限钱，师父又好似几有运，买乜赢乜，于是将私己钱跟师父投资。

事实上孝哥渐渐发觉老婆染上了一舖博就有唔博就无的赌徒心态，对所有买卖都有兴趣，完全收不到手，而最惨孝哥最近身体出问题，仍然博老命北上，外人唔知内情，背后封佢做“恨钱怪”，其实是赌债夫还。

尤其近期大冧市，孝嫂输到冒冷汗，孝哥惟有带孝嫂去睇心理医生，希望情况会改善，由于想卖物业填氹又卖唔出，连孝哥自己都郁出病，认真头痕！