独家丨陈咏燊拎大纲向电视台Sell剧冇下文 解构《饭戏》成功因素原班人马拍续集

导演陈咏燊（Sunny）执导的第二部作品《饭戏攻心》，票房冲破7600万（截稿前），暂时稳守香港十大电影票房第二位，打破多项香港电影纪录，他已有计划原班人马开拍续集。电视方面，Sunny首度监制及主持的ViuTV节目《导演•门》亦有口碑，更聆听观众声音，将未出街内容在网上播出。不过贵为7600万导演都并非事事顺利，他自爆早前向电视台叩门开拍电视剧，但得个倾字冇下文。采访：杜杜 摄影：Stanley 发型:Anthony Wong化妆:Lisa C. Makeup Art服装:CLUB MONACO、New Balance Hong Kong

Sunny两套导演作品都有不俗成绩，风格给人贴地感觉。

 

《饭戏攻心》票房已超过7600万，成为香港电影史上第二卖座香港电影。

 

凭首部执导作品《逆流大叔》省靓招牌的Sunny，对于《饭戏攻心》再有佳绩，他未敢自满，认为关键是天时地利人和，“我近年好信缘份，演员又好投入去谢票，撞啱有好好嘅电影喺我哋前面上画，令到大家对回归戏院睇港产片有返个习惯，再加埋呢两个月冇乜大嘅西片，天时地利，当然老板同埋宣传团队好努力，亦都要我哋套戏本质上有一定成绩。”

Sunny领军不断谢票宣传，成为票房创佳绩其中一个原因。

 

做导演做到巴士都有Sunny个样，都算威威。

 

对子华疯狂加分

《饭》片叫好叫座，Sunny有计划原班人马再合作，早前黄子华更收到他送的续集故事大纲作生日礼物，“我几期望呢一套可以延续，难得储到六位化学作用咁好嘅演员，而佢哋经历呢一集同谢票，关系咁好，点解唔延续落去呢？当然大前题系个剧本要度得好满意，度到一个新嘅形式可以重聚，而又好睇，我会认真度，如果又系一个景六个人，做咩要玩多次先？要有新冲击，大家等吓先。”

拍《饭戏攻心》续集前，Sunny已率先创作舞台剧版。

 

众所周知Sunny是子华忠粉，能够跟偶像合作机会难得，而最可贵跟偶像近距离接触后，不但冇减分而是疯狂加分，“冇乜太多反差，所有嘢都好惊喜，之前我系完全唔识佢，我系好惊接触偶像，有反差会好失望，子华神系好到呢，个人又nice，又尊重创作人，我哋沟通过程之中，互相信任程度好高，真系成队crew都好钟意黄子华，坦白讲大家都系fans，另外五位演员都好尊敬子华神，但系佢嚟到大哥哥咁，令到大家一齐倾偈一齐玩，好多样嘢都好欣赏佢。”

能够跟偶像“子华神”合作，Sunny觉得相当幸福。

 

Sunny大赞拍《饭》片期间，子华就好似大哥哥一样照顾台前幕后。

 

想向陈可辛偷师

Sunny曾为编剧会等单位访问过不少电影工作者，发现有一定吸引力，于是向ViuTV卖桥开《导演•门》，揾来两代导演对谈，是近年难得访问幕后人的节目，有深度得来又不失娱乐性。Sunny坦认是自肥之作，“我上咗十堂补习班，每集录成两个钟，剪得四十五分钟出嚟，啲大导演又好唔吝啬咁教你嘢，同你分享。”他每集都很喜欢，唯独放弃做主持，跟师傅马伟豪（Joe）接受访问一集例外，“我讲嘢多得滞，我几想分返前辈三分二后辈三分一，但可能我同Joe交叠太多，佢讲嘢唔多，有时讲某件事答得精简，而𠮶件事我又在场，冇理由唔答埋，我剪片时都想剪走我一啲。”

Sunny拍第一集《导演•门》，揾来老友郑保瑞和李子俊做嘉宾，当他们白老鼠来试。

 

Sunny在《导演•门》中，最唔满意跟师傅马伟豪出任嘉宾一集。

 

在多位被访前辈导演中，Sunny最想得到陈可辛指导，“觉得最近自己style嘅前辈暂时系陈可辛导演，我好钟意UFO年代嘅电影，又系爱情、人物，𠮶种轻喜剧，佢嘅风格系我仰望同跑紧去，再偷师捉住陈可辛导演可以倾几日，逐套戏问都有排问啦！”原来好多《导演•门》观众向Sunny反映觉得未够喉，徇众要求下他打算将未出街访问片段在网上播出。

Sunny认为较接近陈可辛导演风格，所以最渴望向对方偷师。

 

冇信心拍电视剧

近年都有不少电影导演踩入电视圈拍剧，好似叶念琛、冯志强和袁剑伟等等，Sunny原来早前亦有计划，“大约半年前有谂过搞剧，大纲都写埋，有拎去电视台倾，但倾倾吓冇下文。”不过拍开电影的他又觉得未必适合拍剧，“譬如《饭戏攻心》拍出嚟两个钟，拍咗十八日，电影嚟讲算系好少时间，即系用九日去拍一个钟头嘢，但系去到电视台可能系三个钟拍一个钟嘢，𠮶吓取舍我暂时未识做决定，要拍快好多，但又要keep到质量，keep到好睇㖞！我暂时未有信心去做，你叫我度剧嘅剧本可能有心机，拍可能会揦手唔成势，而且如果搞剧一定会贪啲唔会得十集，至少十五至二十集，𠮶个吃力程度又会高好多，我暂时未有信心去handle。”

Sunny暂时都想专注执导电影，认为拍电视剧未系时候。

 

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。