世界杯2022｜专栏：日本比利时教练保守之过

日本队可以好精采咁赢德国，但又可以好肉酸咁输畀哥斯达黎加，点解呢？日本未失波前踢到“阿婆行路”咁款，对手踢得非常舒服。日本喺下半场中段换入三笘薰，结果佢有近二十分钟无落过底线，完全发挥唔到强项。迟迟唔换走部分脚风唔顺嘅球员，落后紧仍打双防中。呢场日本队教练森保一嘅部署，要错嘅都错晒咁滞。

艾尔讲过日本可以走得更远，大前提要“一哥”保持对德国嘅高水准临场调动。对住实力较弱嘅哥斯达黎加，部署仍系咁保守，经过呢场败仗后，各位都系唔好再将森保一当神咁拜。

比利时输畀摩洛哥零比二，艾尔讲过比利时第一场远离水准，用人上要有改变先有转机。结果，今场三中坚人选无乜变过，前线继续用把握力极差嘅巴舒亚伊，夏萨特继续无贡献。结果，七十几分钟先换走巴舒亚伊，八十分钟先换入卢卡古，部署上又系错晒。奇云迪布尼话比利时今届无可能拎世界杯，因为球队太老。其实，阵中大把年轻兼用波能力强嘅球员，只系马天尼斯唔肯用。呢场败仗证明呢班“黄金一代”，踢出嚟已经变成“黄金末代”。

日本同比利时嘅败绩，就好似玩“锄大D”揸住“四条二”都可以输，就系想睇定啲先而唔出住，几靓嘅一手牌都玩到烂晒。艾尔只可以同森保一同马天尼斯讲：“祝你好运！”

B组伊朗会同美国进行生死战。美国今场要赢先可以出线，阵中球员有潜质但欠火候，前线入球能力一般。今场对住重新振作兼有半个地利嘅伊朗，相信唔容易攻得入，先考虑让球受让“+0/0.5”下盘，再考虑半场和。艾尔

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。