中招辅导员

上月中招之后，小弟多咗个身分——中招辅导员。不停有各行各业老友静鸡鸡查询。
　　
呢班老友，并非街边阿叔、维园阿伯，而是在本业有头有面英明神武者。
　　
原来佢哋在自己专业好巴闭，但并非乜都识，又唔好意思问人，以免被觉得好无知咁。其中有一样更唔知点问，正是——中咗招点搞？好在有我呢个“中招先锋”朋友，于是个个来讯问：“喂喂，碌Sir，不幸中咗招，会唔会……”N咁多问题，综合之后，不外乎以下几条：
　　
一、中招其实有乜感觉，会唔会好辛苦嘅呢？

二、中咗招，是否一定要申报？唔申报会有乜后果？

三、假若申报，点申报？如实申报后，会否畀人捉去“糟糕湾”隔离㗎？会否强逼要入营㗎？好惊！因为唔知同边个同房，容乜易困兽斗？仲有，我最怕用公厕，又日日食惯饮惯乜乜物物，可否带埋入去㗎？

四、假如我中咗，会否全部家人都唔准出街，要陪我一齐坐疫监呢？若如此，点揾日常支援？

五、若我如实申报，跟住会有乜程序要面对？由边个确认？由边个畀手带？由边个畀药？有乜嘢药？
　　
六、收到隔离令后，几时先放监？假若七日后仍两条线点搞？要“藕”几多日才掂呢？
　　
七、若七日后连续两天测试为阴性，是否可以自己剪手带？边个知我是否真系经已“冇毒”？
　　
八、听讲卫生中心条热线“一世都打唔通”，若如此，有疑问时，可以问边个、向边个求助？
　　
以上就是综合所有提问者的疑虑。全部小弟经历过晒，故可以一五一十咁详细解答。
　　
不过，做咗大半个月辅导员后，我自己问自己：“喂，咁鬼多英明神武者一嚿云。咁等而下之的普通草根市民咪仲大剂？究竟点解会咁？”答案好简单——主体官员解说不足！
　　
其实小弟呢个“中招辅导员”角色，根本应该由政府拍一条宣传片取代，在各大电视台及网上日播夜播，将中招知识普及化，咁咪唔使条热线忙到烧线都未得掂囉！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。