头条独家丨黄子华狂窒细佬似做栋笃笑 《饭戏攻心》演张继聪陈湛文大佬

“子华神”黄子华继去年《乜代宗师》后，今年再有贺岁片《饭戏攻心》，拍住张继聪和陈湛文（Peter）合演三兄弟。三人虽然首度合作，但斋睇访问时互窒的相处情况，已知好有火花，子华甫开始已声言同两人唔系好熟，话狂赞他的阿聪当他是古人，又笑指睇Peter 演的《三夫》大，更不肯俾他们称呼“子华哥”，要求他们尊称为“济哥”。成个访问劲多笑位，似十足㨂笃笑，暂时满足一下一众子华迷。采访：杜杜 摄影：沈健程、叶君海 发型：Helen(子华)、jobbylee@gmail.com(阿聪)、Anthony Wong(Peter) 化妆：阿玉(子华)、Levina Bo(阿聪)、Lisa.C Makeup Art(Peter) 服饰：mijosu、eye's Buddy(Peter)

《饭戏攻心》虽然未知几时上，但子华、阿聪同 Peter先向《头条》读者拜个早年。

戏中靠叉烧联络三兄弟亲情，现实中子华感情最深是妈妈牌雪菜肉丝面、阿聪最爱妈咪牌菜心炒牛肉，Peter就最挂住家中的炆冬菇。

讲到三人戏里戏外关系，子华搞笑话：“私底下真系唔系好熟囉！睇佢地戏大咁样啫！睇《三夫》呀！无办法，我喺戏入面系好爱佢哋，我成日远距离睇住佢哋，睇睇吓有feel真系当佢哋细佬，?家就番当佢哋前辈。”被玩的Peter无奈话：“点呀！《三夫》18年尾先上，咁你唔系大我好多岁㖞！”不过他亦大赞子华，“一个系神级演员，一个系我好尊重嘅师兄，可以同佢哋首次合作当然系好紧张啦！我好惊我呢啲小师弟或者后辈出错！俾佢哋揶揄取笑，但聪哥唔会藐视我，子华仲犀利，佢系一个好好嘅聆听者，接收能力好高。”子华神回，“冇对白我唔应该讲㗎嘛，咪唯有聆听。”

子华唔准人叫“子华哥”，要叫就叫“济哥”。

阿聪赞子华不单喜剧强，演认真戏一样好细腻。

自嘲变古人

阿聪最开心跟偶像子华合作，“对子华感觉同全香港人一样，全部㨂笃笑同埋戏都有睇。”被阿聪狂赞，子华忍唔住再爆，“我开始觉得自己好似戴麟趾爵士，好似啲古人咁，变咗麦里浩夫人咁样。”而私底下阿聪亦跟子华好啱倾，“我哋对武术好有兴趣。”Peter玩踢爆，“拳赛就拳赛啦！武术！”阿聪说：“我哋讲蔡李佛𠮶啲你行开咗啫！”子华亦帮口，“点穴啲嘢你唔明㗎啦！”阿聪：“费事同你讲，内功都冇。”Peter坦言冇份参与睇拳赛，子华即寸他，“佢成日想攀附我哋作为武术界嘅巨子。”阿聪话子华比他追得更贴拳赛消息。不过子华自爆戏中被阿聪抢女友邓丽欣，但阿聪反驳，“佢会用抢，我会话我曾经让过我最心爱嘅女人畀佢。”子华：“你都唔知佢让咗畀你，‘孔融让梨’都话畀对方知呀大哥，但被让都难能可贵嘅。”

Peter开心跟子华和阿聪合作偷师。

子华和阿聪戏中两兄弟会争女友邓丽欣。

追问阿聪和子华有否互相切磋，“戏入面有囉！”子华再爆，“咪中咗囉！梗系我中啦！手长脚长！”阿聪说：“我有支籐条要打佢，佢本身有个护脊喺后面，我可以尽情打落去，点知我拉弓时见到佢个护脊移咗位，但已经收唔到手，啱啱打中佢冇垫𠮶度，我心谂死啦！”但子华笑说：“好彩，我都可以打返人哋一嘢。”Peter举手，“咪还返一嘢畀我囉！”不过子华坦承被打时坚痛，“好彩系鸡毛扫啫！𠮶吓打完我都呆咗，好似揾车撞咗一下咁。”阿聪话之后大家冇停继续演，反应好真实。

子华和阿聪戏中两兄弟会争女友邓丽欣。

阿聪大谈“济哥”名字由来，竟然令只白躺着也中枪。

被尊称“济哥”

访问期间，阿聪和Peter不时尊称子华做“济哥”，仲令白只躺着也中枪，阿聪说：“初初我梗系嗌子华哥，点会好似Peter咁一入嚟就嗌子华，我哋啲中生代好识规矩，但子华哥就话‘白只𠮶啲都系嗌我子华，但你嗌子华哥’，但系我真系冲破唔到。”子华：“佢已经畀呢行沾污咗佢清白嘅心灵，佢而家变咗个世界聪。”阿聪再解释，“如果访问时咁嗌，下面啲回应会话‘你系乜水嗌人子华，我唔够白只辈分高，攞奖后劲咗’”子华：“白只自从攞奖后就目中无人。”子华最后谂到方法，“有啲名好适合嗌哥，譬如发哥、四哥，但子华唔啱，我话可以嗌哥，但叫我做‘济哥’。”阿聪解释，“你有冇睇过套江湖片系发哥做叫‘济哥’。”所讲是发哥主演的《江湖情》和《英雄好汉》中黑社会大佬角色“李阿济”，戏中被尊称“济哥”。Peter透露王菀之就最醒目，“佢直接嗌佢Kamisama（神）。”问到子华感受，他无奈说：“都唔知讲紧咩文，佢哋日日都用唔同语文沟通。”

发哥主演的《江湖情》和《英雄好汉》中黑社会大佬角色“李阿济”，戏中被尊称“济哥”。

子华认为导演陈咏燊执导《饭戏攻心》，笑中有情怀会吸引到观众。

近年社会气氛差，子华承认要拍喜剧?人笑更难，早前跟郑中基拍广告时都讨论过，“?家可唔可以拍一啲纯搞笑戏，我哋都觉得唔得，所以我好钟意呢套戏，佢有种情怀，当然有晒喜剧元素同戏剧效果，两个亲爱嘅兄弟钟意一个女仔，同埋难度好高，用几餐饭嚟到搞掂呢场，?家需要呢啲戏，同埋香港观众个接受力，因为搞𠮶啲纯搞笑，短片睇晒，你点赢啲短片啫！一分钟已经爆，再搞落去都攰唔会睇，真系要做到好引人入戏，先可以《饭戏攻心》。”

六位主角戏中有大量同场戏，日日都拍得好开心。

子华跟“马来西亚女神”林明祯有感情戏，他大赞对方学广东话叻。

Peter戏中首次跟王菀之饰演一对。

立即下载 | 全新《星岛头条》APP :https://bit.ly/3yLrgYZ

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。