基仔自誇堅挺彈番轉頭

昔日「新五虎」前晚合體現身紅館，合唱《當年情》，又合力搞笑掀起一片笑聲。基仔前晚介紹表演嘉賓出場時，起初提到「今日好難得，上次約得4個，差1個，今日幾經辛苦搵齊5個。」然後古天樂、吳家樂、劉愷威和何遠恒徐徐升上台，令觀眾驚喜歡呼。古仔叫兄弟站前少少安全些，笑言那是基仔跌落台的案發現場，基仔即表示：「案發現場就是企前呢個位啦，反而企番後少少安全。」古仔卻又笑基仔：「哈！你都好嘢，咁都冇事！堅挺即係堅挺！」基仔反擊︰「我巨肌嚟吖嘛！」古仔繼續進攻︰「哦，你就係落台嗰吓靠條巨肌撐撐所以冇事！」基仔乘機自誇︰「係呀，我動L咁彈番轉頭，哈哈哈！」吳家樂即笑言︰「唔怪得Lorraine跟你咁多年啦！」台上連翻互窒，令台下笑聲不斷。
笑指錢國偉玩嘢
之後四虎大講對基仔印象，劉愷威指基仔好濕，何遠恒讚基仔是好男人，卻被古仔取笑：「即係冇講嘢啦！我最近睇新聞，你同個咩彩華散咗，係咪嗰晚我哋約食飯你冇出現，去咗滾所以散？」何遠恒即耍手擰頭：「唔好講呢啲啦。」當四虎問觀眾想聽甚麼歌，觀眾大叫《男朋友》、《今期流行》，現場即響起《今期流行》的音樂，古仔即指着控制台監製錢國偉大叫：「肥仔，你唔係真係玩嘢呀？！」何遠恒、吳家樂更大跳古仔經典拜神舞，觀眾呼聲四起！古仔求大家放他一馬：「歌可以唱，舞就唔好逼我跳！我拜神拜咗咁多年，唔好搞我啦！」
昨午拜神頸梗梗
昨午5時半基仔為尾場個唱拜神，未知是否因墮台意外留陰影，他做足儀式，高舉3支大香時唸唸有詞兩分鐘，又食燒豬取好意頭。傷勢未瘉的基仔步履生硬，回望身後也要移動整個身，最初神情嚴肅，切燒豬時聽到大家高呼才稍露微笑；期間古太Lorraine也關心地偷望老公，公司高層霍汶希慰問基仔頸傷，基仔見有歌迷到場打氣也親切揮手。