波動市況我只撈兩類股｜唐牛

美伊戰爭未見停火，雙方各說各話，令市場不明朗因素增加，波動性亦大大提高。今日話停戰，明天隨時繼續開拖，做好做淡坐過夜同賭錢冇分別，記得用注碼控制風險，玩貼價牛熊更要有total loss的心理準備。

我心臟唔夠強大，呢兩日都冇炒市，寧願趁下跌捕捉個股執雞機會，主力兩類股份。第一類︰高息ETF。本欄一向主張，高息股只宜低吸不宜高追，難得因市況急跌，收集中長線持倉相對穩陣，華夏亞洲高息股（3145）、富邦滬深港高股息（3190）及恒生高息股（3466）我也有趁低吸納。

第二類，績優高息股。同樣都係高息，配合業績支持，如果出現錯殺，回彈力一定夠強，以本欄愛股太興（6811）為例，上周五一度急挫後，本周已能逆市企穩。當然，要即時賺大錢冇佢哋份，但勝在買得安心，技術含量較低。

唐牛