聲秀｜譚耀文夾埋鍾舒漫劉浩龍與16強學員開騷 1.18麥花臣迎畢業禮

由《聲秀》十六強學員包括馮熙燮、柯雨霏、胡子貝、張津銘、徐惠晴、布子殷、陸卓謙、冼奕瑜、胡港豐、司徒泆、陳卓怡、林潔心、甄敏芳、周智敏、蕭凱恩和穎喬一起參與的「《this is OUR STAGE》聲秀畢業演唱會」，將於2026年1月18日晚上在麥花臣場館隆重舉行。

銀色旅途馬拉松

一眾導師也非常期待再次和學員合作，剛開完個唱的譚耀文是布子殷、胡港豐同蕭凱恩的導師，他表示：「每一次我都好享受和珍惜有機會同自己嘅學員一齊演出，尤其是今次係佢哋完咗比賽之後，首度正式踏上屬於自己有份嘅舞台去表演，當然為佢哋高興，我能夠同佢哋一齊參與，感到非常驕傲。我亦希望藉住呢個機會令佢哋緊記感恩呢回事，因為而家只係佢哋剛開始踏上銀色旅途，日後仲有好漫長嘅路途要走，所以希望佢哋學會時常記住每一個曾經幫助過佢哋嘅人，這樣日後才會成為一個真正傑出同成功嘅藝術家。」

冼奕瑜和司徒泆的導師鍾舒漫（Sherman）回憶說：「初初同學員相處，到比賽完畢之後，覺得他們心態強壯了，能應付的事情都多了。比賽過後非常想念大家一起緊密練習與溝通的日子，因爲這次的演唱會，又再次能夠一起進入排練到上台的過程，心裏充滿期待，而且現在的默契與感情深厚了很多，再次表演相信會更加投入與精采。」

Sherman非常貼心提供一些心得給日後想參加比賽嘅朋友：「首先要習慣喺唔同嘅環境聽自己嘅聲音，變咗現場音響各方面有咩問題都唔會影響唱嘅狀態；如果係屋企練習時要幻想自己對住好多觀眾唱，直至感覺自然，到現場真係表演嘅時候就容易適應壓力，最後就係唔好諗咁多。」

譚耀文是布子殷（左二）、胡港豐（左）同蕭凱恩（右）的導師。

劉浩龍是林潔心的導師。

鍾舒漫是冼奕瑜（白衫）和司徒泆的導師。

劉浩龍見證學員由白紙變唱將。

鍾舒漫談登台貼士，「首先要習慣喺唔同嘅環境聽自己嘅聲音。」

譚耀文教導學員凡事感恩。

譚耀文剛開完個唱。

比賽唔好玩玩吓

至於林潔心的導師劉浩龍說：「我覺得成班學員可以喺三個月裏面，真係由一張白紙，用一個極速嘅時間去變成咗另外一個人，呢件事係好奇妙！對我嚟講係十分期待同學員係一個演唱會上面嘅舞台一齊表演，因為教林潔心就教咗好耐啦，但一齊合唱真係從來都未試過，所以好想同佢可以喺台上有一個一齊嘅回憶！」至於有何意見給想參加比賽的朋友？他表示：「要諗清楚，係咪真係想認真去面對自己，係先好去參加這類型嘅比賽！真係唔好諗住玩玩吓咁樣去比賽！事關無論導師，工作人員全部人都係百分百投入認真對待呢件事，所以態度真係好緊要！」