$550參加萬聖節派對變災難現場？60人分3盤食物 場地似垃圾崗 主辦方疑人身攻擊投訴者｜Juicy叮

有網民付款$550元參加萬聖節派對，卻懷疑中伏被騙，她直斥派對如同災難現場，力斥場內現7大「災區」，當中包括雖有60多名參加者，但僅預備3盤食物，現場雜物多到如垃圾崗等等。

事主向主辦方投訴要求退款，卻反被要求：「你就當呢$550係請人食飯啦。」事主再三堅持，結果懷疑被主辦方人身攻擊。

$550參加萬聖節派對變災難現場？60人分3盤食物 場地似垃圾崗 主辦方疑人身攻擊投訴者↓↓↓↓

有網民在社交平台發長帖控訴日前參加一個萬聖節派對，懷疑中伏遇騙。該派對活動於上周五（10月31日）萬聖節當晚舉行，名為「沉浸式恐怖廚房Halloween Party」，活動包括：「恐怖懸疑廚房打卡位起，靚女學廚＋猛男主廚NPC，酒水任飲，小食到會，Catwalk show，Game，DJ，Lucky Draw，Clubbing」。

活動於尖沙咀山林道一餐廳內舉行，女事主與朋友一同報名，兩人共$1100元，人均$550，這比單人報名費須$580元略為便宜，「見佢個介紹都講得好似幾吸引咁，個地方又好似唔差，諗住唔會伏啦。」

力斥現場現７大災區

活動流程下午6點至晚上8時為化妝師時間，女事主與朋友7時多到場，見化妝師竟仍未開始化妝，「連啲搞手、MC、NPC自己都未化妝 」，她與朋友換完衫，化妝師條隊已經排到好長，結果「啲人等化妝等到八點幾、九點先化到」，她指一到場便遇到第一個「災區」，活動準備不足，她批評：「搞到啲時間嚴重delay，同你哋所謂嘅rundown有冇match過？」

港女其後又發現，第二個災區是活動內容大縮水，原定三場抽獎，「縮到得一個」。

最離譜災區：60人share三盤嘢食

至於第三個災區，她認為是最離譜，就是餐飲供應極不合理，「60幾個人，佢哋準備咗咩？一盤三文治、一盤魚蛋、一盤薯條。」結果這三盤食物「好快俾人搶晒」。

她質疑：「你覺得60人share三盤嘢食合理？你收緊我哋五百幾蚊，你畀呢啲質素我哋？」她表示，和其他五百多元活動相比，此活動非常「肉酸」，「人哋係講緊去酒店餐廳食自助餐，搞生日party，人哋包起晒成間餐廳，都抵過你哋依家做得咁肉酸。」

酒水任飲變收費：仲要擺個PayMe code出嚟

此外，活動雖聲稱酒水任飲，但結果「大部分都收費」，「仲要擺個PayMe code出嚟，我畀完$550，仲要再另外加錢飲你啲酒？」

活動第四個災區，是「成個party連音樂都冇」，主辦方「淨係搵個後生仔彈結他唱慘情歌抒情歌，唱足一個鐘！完全無萬聖節氣氛可言」。

活動主打的「沉浸式恐怖廚房」體驗則成為第五個災區，事主指現場太細但人頭湧湧，「辛辛苦苦逼入個廚房，睇佢哋班NPC做戲，地方細，又多人到乜都睇唔到就走出嚟。」她質疑主辦方「收咗咁多人錢但冇控制人流」。

事主又批評，負責搞氣氛的MC搞手，控場能力「零分」，成為第六個災區，「啲MC搞手完全唔識hold場，成日靜晒冇人控場，尷尬到一個點，成晚都唔知發生咩事。」

要求退款 搞手：你就當呢$550係請人食飯啦

最後第七個災區是場地雜物多，事主形容多到「似垃圾崗」，「啲袋求其擺埋一邊，又唔安全又唔organize」，她曬出和朋友影的相片，背景均有雜物，「啲雜物多到我真係以為自己去咗垃圾崗」。

事主向主辦方投訴要求退款，獲對方一名搞手電話回覆，她引述該搞手表示因為自己只是幫手，「中間好多流程都唔清楚，冇見到，經常行開咗」，又聲稱「活動完結後feedback係一面倒好評」。

事主再千字文發給主辦方投訴，獲書面回覆表示「可能臨時都會有好多不足嘅地方」，並向事主表示「唔好意思」，「未來會參考多啲意見做得更好」。

事主不滿迴避退款問題，再作伸訴，之前電話回覆的該名搞手再致電給她，她引述該搞手表示：「錢就一定退唔到㗎啦，你就當呢$550係請人食飯啦。」並表示「今次活動賺唔到錢」。

事主：我萬聖節係去enjoy，唔係做善事！

事主質疑「請食飯」回覆批評：「三唔識七我做咩要請你食飯？......我萬聖節係去enjoy，唔係做善事！」她又要求對方出示單據。

事主又質疑該搞手在電話中對她人身攻擊，包括質疑她：「你之前有冇搞過活動呀？」「可能你覺得自己好高質......」事主批評主辦方「疑似想用經驗值嚟躂我」，「無啦啦屈我自視過高，睇唔起佢哋活動」，該搞手最後仍堅決地表示「絕對唔會退到錢」。

網民籲向海關消委會舉報：好搵過KK園

控訴帖文引發熱烈迴響，不少網民認為主辦方「食水深」，「好搵過KK園，下次改名再搵過第二班水魚」，「呃一次就夠食走人？」，有人建議事主向海關及消委會舉報，懷疑主辦方違反商品說明條例。

有網民又以該活動的主題反揶揄主辦方，「得3盆要搶，個廚房夠晒恐怖。」「冇講錯啊：『沉浸式恐怖經驗』。」
  
對於活動搞手叫事主「當請人食飯」，有網民批評：「都幾搞笑喎，而家係買服務喎，咩叫做當俾錢請你食飯呀。」

來源：iris.c_official＠Threads

同場加映：$3699「香港首創」湖南團竟有600人？！港女直擊現場苦況：餐廳洗手間完全超負荷！怒斥旅行社隱瞞↓↓↓↓