湧上「黃金火箭」前應知｜曾智華

升唱升，跌踩跌，這永遠是「分析員」的慣性。今年的金價，非常誇張地不合理爆升，由最低點的每盎司2,614美元，飆到執筆此刻近4,300美元！

此時，無論大行（例如高盛）到本土小型證券公司研究員，紛紛列出多個「理由」，支持金價只升不跌，向5,000美元進發。

呢個世界會有任何商品只升不跌？大家可記得最基本理論——升得越急，跌得越快，插得越深？

太多例子創新高後Free Fall

向前看，大家都冇百分百把握，因為冇水晶球。向後望，太多太多例子是創歷史新高後便Free Fall。遠的不說，單單現今香港的工商舖及辦公室物業，已正在發生中。

對於金價，小弟有些微認識，因1978年誤打誤撞做了倫敦金經紀，返工第一天，帶着陰陽眼鏡奸奸的肥佬上司教：「嗱，做我哋呢行，賺佣嘅，故此必定要游說客人簽下授權書，一旦你可代佢買賣即發達，一於日日不停賣出買入殺佣，知冇？」

當年天真的我，立時大開眼界。

未夠，肥經理繼續：「你也一定要有十個八個理由解釋點解金必升，又或肯定係會跌，才能說服客人買買賣賣。升的理由例如：（一）美元跌黃金升；（二）地緣政治危急，處處在打仗；（三）油價不停升，通脹也令金價不停升；（四）中國人及印度人喜歡買金，而兩國正是人口最多的國家……。」Blah Blah Blah說過不停。

但10分鐘後恍似四川變臉轉口風：「金價升，講完。適當時候你要唱金價跌，原因：（一）黃金無可能只升不跌又無息，十年黃金變爛銅，因根本冇實際價值；（二）黃金不是空氣與食水，並非必需品，隨時被取代；（三）紙黃金不安全，發出機構隨時執笠。實金又煩又重，打仗走佬孭死你，也可能無法出手……！」大堆似是而非理由。

記住，1978年金價由166美元兩年內爆上843美元，5倍多。之後如何？繼而20年不停跌呀跌，跌到1999年的253美元才停步！邊個話金價唔會跌？

資深傳媒人 曾智華