【黃庭桄專欄】小賭換大錢

我知，人必須要腳踏實地，努力工作不偷懶，不要經常發白日夢，一分耕耘，一分收穫。

但人工得雞碎咁多，物價卻不斷上升，即使唔玩唔買唔享樂，剩下來的錢，連一個車位都未必買得起喎！

幸好香港還有一個賽馬會，每個星期都會提供一連串的發財夢給大家希冀一下，幻想下一個幸運兒正是自己。

除了一星期兩次的賽馬和三次六合彩攪珠，每天又有世界各地的足球賽事可供投注，玩法越來越多花款，彷彿告訴大家，小賭可以怡情，大賭隨時變李嘉誠。

不過一個人染上賭癮，真的是多多身家都唔夠輸，這鋪輸了嗎？下一鋪再賭，再輸再博的不忿氣心態，是一個無底深潭，很容易一鋪清袋。所以戒賭熱線的電話號碼，必須要在此講一次：1834633，請記住：沉迷賭博，等於倒錢落海！

話雖如此，如果有節制能力，偶爾小注買下馬仔，或用一張電腦飛，換來中六合彩幾千萬元金多寶的希望，冇壞啊！還看幸運之神何時得閒來關照一下。

就像上周日賽馬日，其中的第九場賽事，因為爆出超級大冷門，刷新了歷來最高派彩的紀錄，令馬評人和馬迷大跌眼鏡。

單是連贏位，十元一注派約二萬六千元，三重彩派約七十三萬元，四重彩派約一百三十萬元，孖T更誇張，買十蚊中正的話，派彩是三百六十幾萬元，真係遍地黃金，只看有冇運執到。

看！人生真的是充滿希望！