【曾智華專欄】香港是「騎師天堂」

無論你喜唔喜歡「軟硬鞭」潘頓都好（佢上周日又表演「關照」細佬「儍仔新」隻「光年八十」 ，唔明？睇片啦），必須承認佢乃當今香港馬圈第一高手，騎技接近佢的，一個都冇，故可翻手為雲，覆手為雨。

一切都沒有偶然，若你武功唔高，真係鬼睬你，只有當你水平去到有操控性時，才會個個怕你（當然包括馬會），配合曬你。

剛剛睇潘頓接受訪問，坦誠道出做騎師辛酸，例如瘋狂節食、戒絕夜生活、滿身損傷、全星期無休止的操馬試閘出賽……當然冇人會同情，因專業上本應如此。不過，有點頗值一提，為佢指出香港乃騎師天堂，原因如下：

一、方便。地理上，兩個馬場只隔半小時車程，真真方便到震。不似在外地，每次出賽都需要捱十小時來回，攰到儍。

二、獎金特高。香港賽馬乃全球最高獎金之一，騎師所獲得的，遠比外地優勝。

三、稅率低。在外地出賽，贏的獎金，分分鐘貢獻一半畀政府庫房，非常冇癮，香港呢，十多巴仙矣。

四、社交生活豐富。只要你有能力，大把人與你結交，建立關係，令事事方便。

五、安全。這個佢冇說明，或者不單指一般治安，而是在外地策騎，可能會不停被社團及外圍佬騷擾，意圖操控。

潘頓早在香港馬圈要風得風，要雨得雨，早已入籍香港，並取得回鄉證，出入內地極方便。今晚潘頓停賽，其他騎師可輪流起筷。我喜歡第九場千二米「風雲武士」及「輕功猛男」。前者上次湯普新劣檔先試一次快活谷，今次換上功力較好的艾道拿，可見真章。「輕功猛男」上次W咗，今次排一檔換賀銘年，博你唔信佢冧莊。