【曾智華專欄】搞男人頭髮發大達

網上廣告與商業潛質，真的深不可測，全面搶佔傳統傳媒生意。故此，若電台電視報章唔同時發展網上頻道，肯定被淘汰。尤其廣播機構，因受牌照影響，限制多多，尺度嚴苛，絕對不似網上的海闊天空，自由自在噏乜都基本可以，尺度寬鬆。

有幾種廣告，只要消費者信，你就可賺大錢，而呢類廣告落在傳統傳媒，有的不太合法，有的不合家庭，少少尷尬。例如涉及性，包括壯陽藥、避孕套，女性的，當然是豐胸。

另有一樣，若你真的有效，必定發達，正是醫禿頭，男女如是，男性市場尤其是藍海。因這樣那樣理由，不少男性二十多歲已開始脫髮，三十歲變光，對愛靚一族，好難接受。

早年的男性假髮，真係假到飛起（如今個別高官的也一眼睇出），極不自然。後來搞嚇搞嚇，開始有明顯改善，小弟老友之中，也有個別起床就戴上假髮，唔講你會唔多覺，要定神睇真才知。

近年又有一種噴霧，短暫幫到地中海一族，藝人政客高官不時用，只要上台出鏡前噴幾噴，即有神奇效果，望落突然多咗頭髮，地中海短暫消失。不過一洗頭就立即打回原形。

要一勞永逸，咁就辛苦啲，重錘啲，做植髮。將自己有頭髮的區域拔出部份，再種回禿頭區域。基於是自己頭髮，不會排斥，繼續生長。這方法二十年前內地已盛行，但我聽見都腳軟，因要先將個頭用化學藥物谷大，方便拔髮及種髮，「豬頭」要近一個月才可變回「人頭」，過程好恐怖，收費兩蚊人仔一條。

不過呢項技術如今已飛躍進步，快靚正好多，香港收五十蚊一條。美國有個名醫稱呢種方法為「插秧」，佢紅到買得起私人飛機四圍「插」㗎。