【曾智華專欄】馬名大忌亂改

今屆打吡如箭在弦，馬會正鋪天蓋地推廣。今屆代言人甄子丹，拍宣傳片當天，記者知佢快做馬主，問愛駒會否命名「宇宙最強」？

眾所周知，「宇宙最強」乃甄子丹的綽號，聽落霸氣十足，若馬名是如此，肯定馬主與馬都會威震馬壇。不過子丹一口拒絕，嘻嘻哈哈話不如叫「宇宙健康」、「宇宙快樂」更好啦。

這就令我想起一位馬圈高人，講述幾十年來見盡馬名改得糟糕，命運也變得很糟糕，唔到你唔信，唔到你唔服。衰運馬不少被改低俗馬名、極端含意馬名，又或對投注者大吉利是的馬名，以上三類馬，絕少能勝出，反之，遭逢不幸、未能出賽、未贏過就要退役的，則比比皆是。

另一類無法解釋，是直接間接有任何政治含意的，也多難以善終。

例如上周六第九場，相信任何資深馬迷都會窒一窒，但又不便解釋，正是有一匹新馬名「愛國者」參賽。愛國乃百分百政治正確，但就因為有「政治」感覺，於是又一次「巧合」嘞，出閘後根本不知競賽為何物，入直路已腳軟，結果大敗九個馬位。前景如何？未知，但馬會規矩，馬名定下後不可再改，「愛國者」如此高尚情操形容，落在一匹庸碌馬身上，真正愛國者，不知感受如何？

所以甄子丹拒絕用「宇宙最強」命名新馬，乃明智決定。跑馬可能出現任何結果，包括戰死沙場，人道毀滅……故此，還是……較好！

今晚戲碼不俗，第二班千二米應該精彩，我取超穩定馬「同祥和順」，突然改跑快活谷，唔會無的放矢。另外，蔡約翰近日頻頻揮軍出擊，「星際快車」基本沙田馬，試準閘後改跑快活谷，配「儍仔新」，事必有因。