【曾智華專欄】練馬師上身大快感

投注賽馬，最大滿足感為「練馬師上身」，即係估中練馬師部署，幾時出擊，點樣出擊。

周三小弟獨畀一隻，正是去年5月開始從未跑近的「川河動駒」，用冷門騎師巫顯東，正常情況，賠率當然最少十幾倍啦。

但我寫稿時，正是「練馬師上身」，幻想自己是沈集成，會點定策略，點解用巫顯東？

第一，隻馬已伏匿匿近一年，遊咗咁耐馬河，都應係時候出擊。放騎師仔上去，可以分多幾蚊，加上排正一檔，好，咁就度如何畀指示騎師。隻馬以前W，跑法正是由頭放到尾，今次有好檔，一於彈閘而出，採取大逃策略，狂放而回，博其他對手跟到氣咳被掟甩。

結果，開閘，果然係咁跑噃，開心到爆炸！我隔住屏幕振臂高呼替巫仔打氣，狂嗌：「頂住，頂住！」頂住邊隻？正是後段如飛殺上的「椒椒醒」。終於輸短頭，冇壞，Q及二重彩執返少少，快樂到震，狂大滿足。

當晚另一開心事，為終見到愛爾蘭騎師麥當能贏「樂捉鳥」顯功架，望日後佢有多啲機會發揮。因遠道來香港，人生路不熟，又冇乜關係，坐冷板櫈好易浪費天才。

講到冷板櫈，最令人遺憾為見到港產騎師陳嘉熙，明日又再無坐騎，究竟點解呢？係真真太水皮，定係……

若再冇得跑，與其次次呆坐，不如提早交返個牌，改做騎馬人，向幕後發展好了。因如今不停被「雪」，若雪到手腳冰硬，有馬比你上陣都冇力騎啦，當機立斷轉跑道應較明智。

明天我又「練馬師上身」，幻想自己是伍鵬志，第一班千二米八隻馬，我出三隻，若三隻都唔去咪Sure Win？但冇咁蠱惑嘅。應該是出高分馬「綠族無限」孭重磅，等「飛鷹翱翔」可輕飄飄殺馬！