【曾智華專欄】何俊賢，你爭氣啲啦

剛剛財政司司長公布《財政預算案》，在立法會莊嚴氣氛下，逐項宣讀時，何俊賢議員斷正，被記者高清相機影到佢心不在焉，冇聽書，反而在用手機炒股票。

這一幕即時令我想起昔日粵語長片中，白燕鬧仔：「唉……你生性啦，人人睇死我哋㗎！」事實，同一情況，小弟也曾經歷過，沒齒難忘。

時為上世紀六十年代，我就讀中文小學，兼家境清貧，家父捱得好辛苦，儲咗少少錢請補習老師，正因望個仔能入讀名校聖若瑟書院……日日艱苦地不停操英文，終如願。

但其時不少親友三姑四婆當然有點……乜新鮮蘿蔔皮？考讀入名校？終於，慘，正因資質不足，凡考試就滿江紅，返家面對老父，當然大刑侍候，打到開花，因佢耗盡心力勞力積蓄送我到名校，竟然讀到咁款，變籮底橙，分分鐘被踢出校，怎不激到幾乎嘔血？此時，先母正正扮演「白燕」角色，語重心長，一邊幫我用藥油搽藤條痕，一邊話：「仔呀，你生生性性努力讀書啦，出面好多人睇死我哋㗎 ！」

點解見到何俊賢在立法會開會時炒股，我竟諗起被老爸狂打及老媽教誨呢？

正因香港「由治入興」後，建制派議員幾乎唔使爭就入到議會，月月十多萬元薪酬津貼，又可大大聲質詢政府官員，到時到候就跟大隊舉手投票。這情況純大形勢使然，暫時如此，只好如此。不過，當然有大量市民不是味兒。

這情況下，本來作為建制議員，理應扎扎實實做事，認認真真開會，這樣大部分香港人才無話可說。可惜……何俊賢議員，你生性下好冇？唔該睇睇內地人大政協開會時，與會者是何等專注，人人會將重點記低，而你呢，竟在炒股？