【黃庭桄專欄】勇敢活着

當神隱了多年的前港姐冠軍李珊珊，坐在我的身旁，進行一個深情訪問，感覺恍如隔世。

思憶剎那間回到1996年的某天，我去到一間排舞室，探望歌手Ansonbean的媽媽林佩佩。當年她開設模特兒公司，旗下靚女如雲。她向我介紹一位靚女，身形高大，樣貌甜美，芳齡只有十九歲。

只見小妮子向我展露青春洋溢的笑容，討人歡喜。「佢叫李珊珊，今年參選港姐，你覺得有冇機會？」林佩佩問我，我回以肯定的信心：「一定係大熱門啦！」結果李珊珊艷壓群芳，成為四料冠軍，開始了多姿多彩的演藝圈生涯。

「嗰個年代一星期玩幾晚，成班朋友至少三、四十人，夜夜笙歌。突然間有一日我覺得好攰，問自己係咪成世都想咁熱鬧去玩？」於是她狠下心腸，謝絕所有朋友約會，放棄任何吃喝玩樂的機會，自我封閉，從此消失於人海。

幾千日不見，隱居家中足不出戶，後來她重出江湖，公開承認她原來患上驚恐症，箇中折磨不足為外人道，「有時我會無端端咁嘔，係噴射式咁嘔，搞到周圍都污糟晒。當我病發時，即使見到粥水都會想嘔，搞到個人唔會有興趣去食嘢。」

治療藥物的副作用，令她身形暴脹，「我現在已經減咗八成藥，當我決定由山窿行返出嚟呢個世界，已經預計會有人批評我，身形做乜變咗盧覓雪或者盧宛茵，但我見到有98%嘅網友都係叫我加油！」對於上天給她的衝擊，李珊珊視作美意，「到呢一刻我可以出返嚟，又行多咗一步啦！我一定會活好呢一生！」