【曾智華專欄】便利店最多人偷乜？

早前小弟在本欄埋怨，話幫襯開的一間便利店麻鬼煩，將大批香煙堆呀堆，堆到遮住顯示找數銀碼個Mon，搞到客人要側側身好似偷窺咁望，毫無道理。

其實你我都知，當然不會冇「道理」，原因又係一個錢字。因便利店內，每一吋都係錢，所以，點樣擺設，擺喺邊個位，連左右高低、店內店內，都經過精密計算。

熟知行情的「批發榮」笑笑口話：「碌Sir，邊個畀最多錢便利店賺呀？當然是煙商啦。咁邊個位置顧客避無可避，必定要見到商品呀？咪正是找數個Mon的前列位置囉，全部刻意。不過，聽講你公開投訴後，移歪咗少少啦，你知嗎？」 咁又好似係。

「其實煙仔外，任何最好賣、最賺錢嘅，一概放收銀員前後，例如避孕套及酒類。仲有，回佣越多，位置越靚，你可發覺最近大量各式遊戲卡也佔據黃金位置呢？因學生一買幾十張，乃最新金礦！仲有舊品牌中式藥油也如是。」

「咦，由此推論，榮哥，肯定報章雜誌是雞肋啦。我幫襯那間，全部放到門外。」

「中！報紙雜誌，尤其後者，阻地方兼唔多賣得，冇油水，故肯定不日全部消失。至於報紙，尤其舊區，仍有大量捧場客，應該最少仍有幾年玩吓。」

講講吓，「批發榮」又指出，報紙加價後，銷量只輕微下調，事實，相信報業集團最想谷的，仍然是電子化，因印刷、紙價及製作成本，紙版比網版貴太多了。

「講多樣嘢你知，碌Sir，你估便利店內，最多人偷乜？貴嘢在收銀員附近，好難落手。原來失竊最多係馬經啊，哈哈哈。單張的當然最易偷，綜合報紙內的，亦經常被抽去，但銀碼太細，店商都無謂做大動作去預防啦。」