【曾智華專欄】點解你畀人呃？

新春飯局閒談話題，最多人有興趣：一、為乜咁多人做騙子；二、為乜咁多人被呃，乜咁多成年人咁蠢？

小弟開班教理財，有兩重點要求學員日日記住，一為：唔好亂投資，甚至唔好投資，惟有如此，才能立於不敗之地。第二，商業世界，騙子如麻，合法與非法的，矚目皆是，個個以「賺」及騙你的錢為目標。

以上兩條，主要希望你咪不停發白日夢，以為投資與賺錢有個等號。事實呢？十次有九次剛好相反，有冇咁蠢成日走去蝕本？分享過程中，我舉出無數的實例。

至於騙子，其實由零開始已滿布大家身邊，化身成為乜嘢人都有，不少更有個合法身份，例如「投資顧問」，或乜乜物物「中介人」。總之，任何人埋你身，話好想益你、替你搵錢，又或提供搵錢機會，甚至獻身與你合資做生意，一於全部兜腳伸佢哋走可也，絕少機會會踢錯人！

全世界騙子點解咁多？因大有市場。點解市場咁大？人性囉。人性中的弱點，有不少永恆存在又畀晒位騙子入的，包括：貪婪、恐懼、無知、好色、寂寞……以及有一種，個別內地學生會中的，正是「身有屎」。

「身有屎」呢句廣東俗語好核突，但勝在一矢中的，形容得極精準。

點解中招者咁驚「海關」、「公安」、「入境處」、「電訊管理局」……以正常推斷，能來港讀大學者，幾乎肯定是內地尖子。點解尖子會咁冇常識，咁易受騙？

這又要問到，點解佢哋咁有錢，錢從何來？若由父母而來，父母巨富，又從何而來？一連串的問號後，順藤摸瓜，就會知道佢哋點解連普通人都「不可能相信」的電話欺騙，竟然會信。但佢哋會願意坦白相告原因嗎？你話呢？