【曾智華專欄】M記咁搞，你點處理？

今日標題的M記，並非麥當勞漢堡包，而是何文田廣場數一數二的大集團超市。

長輩教落——得饒人處且饒人。對，我經常執行。但另一方面，政府又日日夜夜宣傳——今時今日咁嘅服務態度，唔得㗎喇！香港乃一個國際城市，遊客眾多，若搞不好服務質素，一路向下沉的話，請問對邊個有好處？

小弟態度，若遇上小本經營，尤其街邊一類食肆，質素唔掂，算數，嗗聲吞咗佢，幫襯第二間可也。

但若是代表香港品牌又唔同，若服務太差太離譜，為本城整體大利益，點都應該發句聲。

兩個月前在本欄講述的國泰航班經驗，正因被困候機室、機艙、入境處等候區十一小時，國泰完全不提供任何食物，餓到二百幾名乘客MM聲呱呱嘈，我作為其中之一，也慶幸冇餓暈，於是公開投訴。其實除為一眾乘客申冤外，亦希望國泰盡快改善「餓暈人」政策。

終於兩星期後有回音，承諾改善，且看日後又如何了。國泰航空乃香港人「驕傲品牌」呀！

講返何文田M記，就在住處附近，故不時幫襯，多安排送貨。碰啱去年尾有七十人團年飯，於是決定在M記買酒送到宴會場地。先問問經理得唔得？答曰：「曾先生，十日內，因越區。」

冇問題，預早十一日訂，畀晒錢。

終於，弊傢伙，到第十日影都冇。擺酒冇酒，成何體統？

第十一日早上再親身到M記追，又答曰：「放心，今日內送到。」

結果？唉……真係踢晒腳，再變「冇影行動」，乜承諾嘅服務可以變冇尾飛陀？怎不火都嚟。不過撳住，先諗點收科。

無奈，只好撲又撲再買夠當晚用的酒，然後安排車去宴會現場，身水身汗自己搬。

搞完，面對M記咁搞法咁服務，點處理？