【曾智華專欄】寫稿機器年尾開動

凡到任何社交場合，必有人問：「碌Sir，乜你咁多嘢寫，寫極都唔斷㗎？」

問的，當然是不屬傳媒的行外人，佢哋想像，要嘔一篇專欄，可能由構思到起筆到寫完，非三五個鐘頭不可。若真的如此，相信好多專欄人已餓死，哈！

其實每個工種都講天分、講興趣。若冇天分、冇興趣，勉強做，不但辛苦死，更恍如拉牛上樹，難若登天。事實我亦曾有老友猛拉關係搵個專欄寫，結果兩個禮拜乾塘投降。

簡單，你以為騎馬好易，但若真的爬上馬背，可能好快嚇到瀨尿，因馬喜歡向前衝，你不懂馬性，不懂操控，撻死未天光。但具天分騎師呢？日日騎十場八場高速衝刺比賽，絕無問題。

講返我自己，正牌火麒麟，對世界任何事物皆感興趣外，更對不少人、事及物，有自己的觀察及看法，好想分享。

就此，十五歲開始已化名在年輕人報章寫球評，寫呀寫，冇停過執筆，至今已五十六年，用上的筆名超過三十個！

寫稿一如不少工業，有個趕工期，正是舊曆年尾，報社員工例於此時放年假，所以，能夠預早準備的版面，一律要提早埋版，以便大家早早收爐，人人回家團年，舒舒服服享受與家人團聚的歡樂。

就此，平日本每日交一篇，但際此緊張時期，編輯例必成個月前下指令，要求某日之前交三五七篇。

點搞？我絕對冇難度，一於開動體內的「寫稿機器」，睇睇有乜冇時間性的，立即落筆，車衣似的去馬，題材順手拈來可以是旅遊、飲食、電影……甚至批評政府政策、月旦社會時人時事。再唔夠？咁就化身財經評論員，尋找大市中可以留意的股票，拆解公司的策略與前景。總之從未試過乾塘，擔心冇嘢寫。