【曾智華專欄】潘頓夠數．布文翻生

香港馬圈乃澳洲幫天下，早是不爭事實，若想拗，你肯定係新嚟嘅。班友真可以翻手為雲，覆手為雨，吹脹馬迷。

所以，唔理真真假假，場場估點開，反有更大樂趣，非馬迷冇可能明白，因馬迷與非馬迷，處身兩個不同境界。

兩個月前馬圈中開始有個流行講法，正是一日「軟硬鞭」未「畢業」（破韋達紀錄），一日「哈囉文」都會玩夢遊馬場。幾時會醒返回復真身？正是當潘頓望見「終點」之時。係真唔係真，事實已經話你知。

「軟硬鞭」睇走勢，明天將在大賽日大力敲馬迷個「喪鐘」，開晒香檳，噴埋煙花，在眾星拱月中，破香港馬壇紀錄（此紀錄，絕後機會極大），到時你喜唔喜歡佢，都應承認佢有超級騎功而恭喜一聲，因呢個紀錄絕對唔係「造」出嚟，而係「騎」出嚟的。

雖然大家心照，若佢場場嚟真，應該一季前已破紀錄，只因條「軟鞭」經常作怪啫。

好嘞，潘頓畢業，布文當然火速翻生嘞。老友，過去三個月，你有幾何見過布文好似周三咁「布文」（即回復世界一級高手風範）的吖？W三場，另Q兩場，全冇符碌，「真布文」返嚟喇。

從此，馬迷可能有返條「扶手棍」，雖然澳洲幫仍會操控大局。

好嘞，咁畢業後的「軟硬鞭」會點玩呢？此乃「哲學性」問題，大家齊齊估啦。

明日興奮死，因有兩場一級賽舉行，我的矛頭，係睇潘頓贏幾多場，以便眾星拱照佢破紀錄，以佢老哥今時今日地位，要去馬，肯定冇人會阻頭阻勢，事實也阻唔到。

明日潘頓只出七隻，會贏：「嘉應高昇」、「永遠美麗」、「光年魅力」及「友愛心得」。一於W四隻穿勻，等佢破紀錄。