【黃庭桄專欄】犯太歲點算好？

朋友阿儀近日常掛愁容，心情低落，我好言安慰：「你冇乜嘢呀嘛？」她恍如大海中漂蕩的小木舟，找到泊岸的渡頭，即一輪嘴向我大吐苦水，呻到樹葉都落。

原來她的生肖屬豬，以十二生肖的相生相剋來計算，豬與蛇是相沖，適逢今年是蛇年，所以肖豬的人會面臨很大的挑戰和衝擊。時近歲晚，阿儀已經驚到震，唯恐在蛇年會黑到痹，隨時會遭逢一連串的劫難。

「我嚟緊犯太歲啊！你可唔可以教我點樣化解？我真係好驚！」她追問是不是應該去攝太歲？會不會有太歲符可以袋在銀包保平安？仲有甚麼祈福的好方法？

始終我不是玄學家，不會講甚麼九宮飛星，但見她因為即將犯太歲，而弄至精神緊張，心緒不寧，於是告訴她一條簡單的算式，以釋除她的疑慮。

就以香港的人口有七百多萬人為例，除以十二生肖，即是每個生肖大約各有六十多萬人，我才不信，所有屬豬的人，都有着相同的命運！難道六十萬個肖豬的人，都會一起在農曆二月都撞車，然後四月也分手，七月皆破財，到秋冬會齊齊確診流感？唔係啊嘛！

即使某個生肖在蛇年是沖犯太歲，但一個人的出生日期，正正構成八字，而生肖只是年柱，在八字的影響力只佔四分一。看一生的命運，還得睇埋出生的月份、日子和時辰，所以不能一本通書睇到老，以為犯太歲便一定會行衰運，這種睇法未免太過杞人憂天。其實想化解太歲衝擊，最好的方法，一定是行善！