【曾智華專欄】攞命電影

每人都有自己的天分、強項，也有自己的限制。正是自己知自己事，故此，我從冇興趣，也不敢向個人的體能極限挑戰，例如參加馬拉松、毅行者、Outward Bound、跳傘、滑翔……不過，雖然我冇膽，亦冇興趣試，但卻有大量朋友一年復一年，甚至一月復一月，走勻全世界參加又危險又艱苦的各種運動，拜服。

點解咁鬼辛苦都趨之若鶩？正是在過程中，尤其能完成時，有無窮滿足感。

近日一再有喜歡「攞苦嚟辛」的老友游說：「碌Sir，你快啲去睇《香港四徑大步走》啦，呢套『第20屆香港亞洲電影節最佳電影』，犀利在並非由行內人選出，而是由觀眾票選，曾經欣賞者無不動容。」

好，即刻入場。真的，由第一個鏡頭開始，你已融入參賽者的身心狀態，無法抽離。

四徑，就是香港四條魔鬼山徑，包括港島徑、麥理浩徑、衛奕信徑及鳳凰徑，四徑高高低低彎彎曲曲穿越整個香港。觀眾透過這比賽，可以居高臨下鳥瞰四徑所經過的山山水水，其天然美態必令你不禁「嘩嘩」連聲。小弟在香港居住超過七十年了，從來不知，原來這裏有如斯多「仙境」，部分誇張少少，靚到令人窒息。

不過，景色雖美，但當目睹每個健兒都拖着乾枯、受傷、病痛、抽筋、暈眩……身軀，不眠不休死捱這個瘋狂體能挑戰活動時，旁邊觀眾不禁慨嘆：「唉，咁都死頂，都唔知為乜；頂唔順就放棄啦，會死人㗎；捱完又點，可能捱出永久創傷，值得嗎？」

觀眾不是當事人，等我代答——百分百值得，尤其能在指定時間完成過程，在歡呼聲中被香檳淋身恭賀時的快樂感覺，實在很難在人生中有同一的爆炸性滿足。