【曾智華專欄】協助女藝人理財

理財，並非個人最大興趣，但為保衛個人財富，近年非常積極研究理財，亦在二十年前已獲得財務自由。

退休後，空閒時間增多，也見到同年老友，原來十之八九對理財一嚿雲，包括做律師、醫生、明星、工程師、教師、教授……等，在個人專業範圍，就算叻到會飛都好，但一涉足金融投資，立即搞到「屍橫遍野」，喊到收唔到聲。

尤其男人，因愛面子又愛威，被人合法或非法騙去大筆金錢，也多不敢張聲，只好靜雞雞躲埋抌心抌肺，飲多兩杯才呻。

有見及此，我決定救得一個得一個，將自己修煉得來的理財智慧，不停分享，總之你有所求又肯聽，我就講。

例如早前有位獨身女藝人Y，幕前叻到飛起，但對理財一竅不通，只懂將賺來的錢秘秘密密放餅乾罐（唔好笑，上一輩女人多數如此）。好處是不會畀人呃，壞處是無法錢生錢，結果如今六十出頭才醒起，弊，應該點搞？

Y妹（我大佢十歲）剛過六十，揸住一千萬元及一層樓，仍好擔心過唔到世，兼且做藝人，正是花無百日紅，唔知幾時有工或冇工開，毫無安全感，所以越來越惶恐。

求教於小弟，簡單教佢：

一、盡買年金五百萬元，月月有二萬三千五百元自動過戶直至離世；二、盡買銀債及政府債券；三、 股票買中電、國泰航空及港交所（介紹埋入貨位）。想要更豐裕的生活，就將住所逆按揭。

以上四項加埋，非常穩陣每月大約七萬元收入，絕無需要擔驚受怕，更另有餘錢享受人生。

總之，千祈咪多手多心研究其他千奇百怪金融產品，也不要信時時「關心」你的甚麼金融投資顧問。因呢個世界冇人有興趣替你搵錢，但個個有興趣搵你的錢！