【曾智華專欄】有口話人，冇口話自己

童年時，經常被長輩教誨訓斥：「你呀，記住呀，咪有口話人，冇口話自己呀。」

唔使解釋，好易明。一路路長大，一路路見證，原來此乃人性的一種，幾乎遇到的人，個個皆如是，問題只是程度上不同而已。

總之，有事發生，十之七八唔關我事，人哋嘅錯，然後，我做就得，人哋就……

今日講呢啲，點解？因眾所周知，香港如今陷入嚴重財赤，故此任何公權人物（各式高官、公職機構及資助機構頭頭、各級議員……）理應全部身先士卒，做個模範，為阿公慳錢，更要非常高調話畀市民知，佢哋不單同舟共濟，更是先天下之憂而憂。

很可惜，市民大眾見到的，卻經常並非如此。不少公職人物，仍是不單應使則使，不應使的，也可能亮出藉口：「我哋依足指引㗎，並無超過預算㗎，以前咁做，如今也咁做咋。」

以上說話，正正是剛剛幾位議員，由立法會主席梁君彥帶領，到日本考察後，被批評時的「標準答案」。

成團人幾天「行來行去」，坐商務機位來回，每人咁使咗五萬大元。

香港人冇幾多個未去過日本，四日行程每人使五萬元，無論從任何角度看，都算相當豪華。若參加的議員反對或呼冤，咁吖，將所有日程公開列出，等小弟搵相熟旅行社打個價畀大家睇睇，咁就知是否物有/超/冇所值嘞。

因應文首，若我係議員，在此非常時期必定坐經濟位或廉航，仲要大大聲話畀全香港市民知：各位，我哋真係慳到盡㗎喇！非公式飯局，只食杯麵㗎咋！若有咁表現，無論做戲或真誠，他日欲在議事堂質詢官員大花筒時，才有「道德高地」。否則，必被指「有口話人，冇口話自己」。