【黃庭桄專欄】除了生死，都是擦傷

跟食鹽多過食米的藝人傾談心事，絕對是袋錢入我袋，特別當話題牽涉到生老病死，更有深切的人生體會。

早前剛做過心臟通波仔手術的肥媽Maria，也是從鬼門關逃出來。那天早上，她如常在家中上香拜神、種菜淋花和放狗，誰知忽然感到心口彷彿被重物壓着，很辛苦，開始呼吸不到，全身又流汗濕透。

工人起初以為肥媽悶熱，拿出風扇替她降溫，她心知不妙，馬上趕去醫院求診，經檢驗後得知心臟中間一條血管塞得很嚴重，需要馬上動手術。「好多時啲人以為搽啲藥油，瞓一陣就會冇事，但一過咗黃金時間，一瞓就會係咁先囉！」

生死劫，肥媽經歷得多，二十年前患過癌，子宮又生肌瘤，連最愛的丈夫也在她毫無心理準備下離世。

「嗰朝我先同佢食早餐，之後佢話想入醫院。去到醫院，佢打晒電話畀咁多個孫，逐個傾完偈就話想瞓。突然間佢話見到有好多天使嚟接佢。」

當醫生說丈夫已經斷氣，肥媽不能接受，撲上病床，攬着丈夫的屍體，唱起二人最愛的情歌，良久不願放手。

「人條命其實唔係想像中咁長，我哋做人好鍾意有一連串計劃，五年後我做乜，十年後又想做乜，仲有冇命做先得㗎？所以我哋真係要活在當下，尤其是我哋呢啲年紀。其實上天對我好眷顧，總之唔好成日同人比較，人哋有幾多身家、間屋有幾大，關你乜嘢事呢？屋幾大，你都係瞓半邊床啫。總之有家人、有朋友喺身邊，心中有愛，已經活得頂呱呱啦！」

問肥媽如果他日在天堂再遇亡夫，會講甚麼情話？「仲講？梗係咀啖先啦！」