【曾智華專欄】國泰餓到我幾乎暈低

睇新聞乃我日日的習慣，但成為新聞中人物，就真係咪搞。點解？因新聞鐵律——Bad News Sells。

你出現新聞當中，十之八九衰嘢也。又中！

今日大家睇見標題，可能問：「喂，碌Sir，使唔使咁火焫焫呀？」但若你是二百個被虐待的苦主其中一個，滿肚火無處噴時，可能會更焫。

昨天講到周一坐CX 630由泰國曼谷返港，結果遇上服務大災難。二百個經濟位乘客（商務客我唔知）十二小時冇半點米落肚，連即食麵或餅仔都冇，未有人餓到休克或暈低，算國泰好彩了。整件事，昨日本欄只記錄到晚上十點半，即人人由四點在候機室開始，至困機艙到十點半，仍得不到任何頂肚支援，只無望地等等等。

十分鐘後，機長正式宣布，無法修理妥善，決定唔飛，乘客落機安排到酒店。

你以為苦難至此，可出機場搵食？發夢冇咁早！仍然全部不准離座，坐定定，等一批又一批辦手續重新入境。本來呢類機械操作式過程，可以飛快搞掂的，但頂佢頭槌，搞到個個想講粗口，咁簡單嘢都玩足三個幾鐘才全部落機，此時已是凌晨一點半！

再講一次，至此仍冇半粒食物提供，國泰當個個「神仙肚」？最冇癮，機上服務員的工作間，卻傳來陣陣香味，即有人有嘢食。小弟冇抗議，因佢哋都係人，但多口一問：「明明機上有二百份餐，為乜唔畀乘客？」答曰：「對唔住，公司政策！」相信最好脾氣者都會火山爆發！

結果由落機到出境再上旅遊巴，全部安排一片混亂，毫無章法，大佬，一間代表香港的品牌，服務使唔使搞到咁垃圾呀？

終於凌晨三點半，我才食到啖自己買的芒果糯米飯。