【曾智華專欄】眾矢之的「軟硬鞭」

久不久就有人問：「碌Sir，你成日窒『軟硬鞭』，驚唔驚㗎？你都話佢隻手遮天，容乜易反咬你一口？冇乜馬評人會咁明刀明槍喎。」

係，的確，寫馬經的老友多會小心謹慎，加上馬會也不時會用龐大影響力去「處理輿論」。事實，冇咗「軟硬鞭」都幾煩，投注率即時減少（其實一有高手替代，日後應慢慢回升），影響馬會高層年終花紅。

不過，基於「軟硬鞭」實在太離譜，加上網上講馬KOL競爭慘烈，近排開始不少「明目張膽」揭露佢跑法離譜的YouTube出現。最正係，我就齋寫啫，而佢哋餐餐連巡邏片段都播出埋，問你匿去邊？明明有位唔上，出閘縮埋，頂人馬屁股，企高跑，臨終點輸硬才出軟鞭扮追。嘩，真係越鬧越到肉，唔知點收科。

其實呢個炸彈已醞釀多時，尤其莫雷拉走後，騎師勢力全面失衡，越來越形成肆意橫行的霸道，而馬會競賽小組對他避忌，也是路人皆見，谷出近月開始的網上輿論大轟炸，其實此乃遲早出現的必然結果。

最有趣是網上講馬KOL，不少有晒背景，屬行內人，包括練馬師、騎師、馬房經理……正是行家一出手，便知你「扮沒有」，死未？

馬季步入高潮喇，國際大賽下月殺到，之前的賽事，報名也相當踴躍，今晚快活谷又跑九場，幾乎場場滿額，除咗五班千八米。

好，就研究吓呢場先。

一般馬跌到落五班，除老弱傷殘外，當然是演出並沒有持續性可言，貼邊隻都係靠估。

比較接近勝出邊緣的應是韋達的「大將」，仍然是處女馬，但四歲，看走勢，上季尾開始成熟，打疊三場跑此程，兩第四一入Q，呢場對手只有「上市魅力」似樣，就買對碰W啦。