【曾智華專欄】衰鬼燈神大翻身

老樂迷必定聽過一首令人十分興奮的國語時代曲，正是電影《野玫瑰之戀》的插曲，由葛蘭唱到當時全城Hit爆的《說不出的快活》。

此曲最煞食為開頭幾句，絕對深入民心——Ja Ja Jam bo，你看我我看你，你看我幾時我有這麼高興過……

為乜突然唱起幾十年前老歌？因上周日賽馬，小弟呢位衰鬼燈神突然大翻身，在本欄提供的馬會短途錦標賽，畀五隻，話明Q、PQ、二重彩、三重彩及四重彩，就在當中，買啦！

呢場有十二匹馬跑，除咗「嘉應高昇」Sure Win外，其他就要靠估。

結果五隻中的「加州星球」倒灶，而其他「嫡愛心」、「驕陽名駒」及「美麗第一」排隊過終點。

各位，你可以暫時唔使我畀邊隻，你就交叉邊隻喇，哈哈哈，真係有「說不出的快活」。

當日也堪一提的，是不少馬評人屍橫遍野，眼鏡跌碎全城。點解？因個個以為今鋪六環彩好易中，因六關之中，有四隻「必贏」，包括「嘉應高昇」、「錶之銀河」、「浪漫勇士」及「包裝猛將」。事實，四匹也是公眾大熱門，全面熱透，故此，馬迷揸住佢哋做膽，只度第一及第五關已夠，應該唔難中噃。

結果？首先「錶之銀河」及「包裝猛將」倒灶，已經不知「死」咗幾多投注者；更大鑊，第十場爆出七十倍的「銀亮奔騰」，除非重錘食全餐，邊個會買中？就此，本來不少馬評人認為六環彩「好易中」的彩池，放滿淚水與鮮血。

喂喂，今晚又跑快活谷，大家千祈咪希望我的「山埃」又全中啊，發夢冇咁早！

研究尾場三班千二米，選「競駿皇者」、「多利彩駒」及「友愛心得」。後駒排劣檔，將分多兩蚊。三隻互穿二重彩、Q及PQ啦，唔會太好分㗎啦。揸膽應是「競駿皇者」。