【曾智華專欄】醜甩耳仔送燒酒

至於傳媒及市民，更加「馴」晒，以前做高官，似日日步入黑洞，因唔知下步會有乜嘢發生也。

「咁係好定唔好呢？」我真誠一問。吓，竟然個個默然，冇人再發聲。

等小弟講啦，無無謂謂的Haters式挑剔，當然有破壞冇建設啦，但為香港大利益的提醒、批評，甚至監察，實在極之有需要。

遠的唔講，單講講夏寶龍主任的重要指示——無處不旅遊，以及不停強調，一定要搞好香港「三港」（海陸空），方便發展經濟，方便吸納遊客。

而特首也日日鼓勵香港市民，無論走到世界哪一個角落，都要「說好香港故事」。

夏主任及特首動機正確又良好，見到佢哋擺明上心上腦希望香港好。但講完大方向，難道兩位自己落手落腳去前線做？

當然係一層一層由上而下（本來最理想是由下而上，層層自發，唔使大老闆指示的），特首司長局長處長專員……齊心協力。

但香港市民見到的現象，又係點？

真真令人氣餒，單講個郵輪碼頭，已經有如童謠——醜醜醜，醜甩耳仔送燒酒。兩年之內，一而再，再而三接駁交通搞到一鑊泡，個個遊客落船後即變「孤魂」，上周又嚟，一宗小事都搞極唔掂，遊客點會「唱好香港」？

大家都知我好討厭特朗普，但佢有一絕招，小弟舉腳支持，正是永遠不拖泥帶水，遇到無能庸碌下屬，必立即當機立斷——You Are Fired！