【曾智華專欄】《破·地獄》的最大驚喜

昨日講到個人認為，明年金像獎一系列最佳——影片、導演、編劇……經已誕生，正因《破．地獄》有彈離性的水平，將其他港產片比下去。

其實，未完未完。

此片過去半年鋪排的宣傳，一直集中在黃子華及許冠文。睇完兩位的演出，絕對出色及與期望相符。黃子華雖然仍是「黃子華」，但已非常努力去演，交足貨。而許冠文，理所當然可問鼎最佳主角或最佳配角，因表現遠勝《金手指》。

不過，可能兩人在超密集式宣傳中曝光太多，故此，感覺上並沒有驚喜之感，反之，一直在宣傳中唔多覺眼的衛詩雅，才令你睇到「嘩嘩」聲。之前欣賞佢兩套《不日成婚》，只覺非常合眼緣及可愛，但去到呢套《破》，簡直似破繭而出，原來詩雅演技可以去到咁高層次。

兩周前睇完《我談的那場戀愛》，覺得吳君如演出非常出色，理應成為明年影后，不過……睇完《破》，立時體會到今次真真一山還有一山高了。

吳君如在《我》片，雖然真的是好，但個別場面仍有「做戲」痕跡。

但衛詩雅在《破》片中，演繹不同場景不同感受時，令你恍似坐過山車般衝上插落，佢每場的駕馭與投入，實在令人擊節讚賞，表演之出色，着實充滿意外驚喜。

金像獎並非由觀眾投票，而是由業內人士投票，今次相信任何行家皆不能不誠心投佢一票，我幾肯定，下屆金像獎影后，經已誕生了。

至於有機會提名最佳男配角人選，應是在電影宣傳中冇份的朱栢康。此君雖然並冇星級魅力，但勝在演技精湛，內心戲掌握精準自然，絕不下於許冠文。《破》片可欣賞之處實在太多太多，應該睇兩次，快快入場！