【黃庭桄專欄】１億發達夢

今晚攪珠的六合彩，估計頭獎若一注獨得的話，可以得到1億元！對！是普羅打工仔即使打足一世工，唔食唔玩唔使，都沒有可能掙到的金錢。

同事們摩拳擦掌，嚷着要夾份買，發一個橫財夢。「如果星期一中咗頭獎，咁星期二咪集體辭職囉！」同事J打趣說。

「嗱！首先請將興奮的心情Hold住，因為要睇有幾多注中，多人中的話會被攤薄獎金，萬一有十注中，頭獎可能派1千萬元咋！然後又要睇返你夾份個比例喎，今次係集體投注，你要記住不是你一個人獨得喎！」

我看到同事J有如兜頭淋了一盆冷水，但數還數，路還路，金額必須講得清清楚楚。

「原來串勻十二個冧巴，要9240元，好貴喎！」同事插嘴建議，不如改買5元一注，可以平一半。

「但如果真係中咗頭獎，咁樣就唔係收1億元，只係收得一半咋！為咗慳4000幾蚊，收少咗五千萬元，你到時唔好抌心抌肺就得啦！」我曉以大義，要食大茶飯，視野必須要大格局，否則做人點會發大達？

我最記得在1997年，在馬季最後一場賽事，三T有超過2億元的彩金，我和幾個朋友夾份，由我負責揀馬，當挑選好各場的馬匹後，投注金額約需1萬多元，其中一個女性朋友嫌貴，說不如留返部分資金作下一次投注，「1萬博2億，值博喎！」我心想，但亦尊重各股東意願，就由那位女士刪走一匹九十九倍的冷馬，結果九隻馬我中了八隻，就是只欠那隻冷馬，2億元就此泡湯，我激氣到今日呀！