【曾智華專欄】我錯！人人問候老姚！

今日這篇稿，有兩個主題！

第一個係——我認錯！

錯就要認，打就企定。小弟錯在乜？錯在指馬會送出「小家禮券」，只得五日換領期。原來呢，乃我眼睛睇得手機多，日漸老花兼視力變弱，睇唔清楚咁細的字，為2025年期滿當2024年，今次我要Say——Sorry。

另一單乃發生在周三快活谷之夜，不少睇咗姚廄發畀馬房旗下馬主例湯貼士者，怒火中燒，當中幾位乃小弟老友，簡直M聲震天。

發生乜事？皆因賽前姚本輝照例「醒」貼士畀馬主，內容：各位馬主好友，今晚出馬七匹，第七場機會壓一，其他第三及第五場有P，祝大家好運！

好運？結果老姚搞到馬主個個行衰運，輸到PK！

首先，佢實牙實齒話機會壓一的「極速奇兵」，當然個個瞓身下注，打到變全場大熱。結果？入直路時已開始紛紛頂姚本輝頭槌，覺得被跣鑊勁，因隻馬根本無力鍊，腳軟軟下跑第八，輸三個馬位，呢鋪真真屍橫遍野！

不過，同一晚，姚廄就爆出近三十倍的「生生勝利」及八倍的「得意佳作」，孖寶中正派近2800元。你話壓一嗰隻就冇影，你唔提的就爆咗大冷，姚廄馬主怎不人人想兜腳伸老姚落大西洋？

好啦，講返小弟貼士先。

近期本欄符符碌碌，貼士中規中矩，周三話明第八場對碰W，中咗「家樂龍駒」派三倍。

明日「精英碗」二級大賽，讓磅，相信馬王「加州星球」會只作熱身，因冇理由孭重磅搏盡。如此，當然要選「嘉應高昇」，新馬王，希斯鎮倉之寶兼潘頓刻意上從化試閘，誠意一百分，但冇賠率。

首先要拖「級制賽殺手」巴度放棄「美麗第一」而轉騎的「驕陽名駒」，劣檔，但會好分。加埋「賢者無敵」啦！