【曾智華專欄】《武替道》冇得頂

近期入戲院睇戲，有一半是中途離場的，冇癮！連自己一直欣賞的高段數演員吳慷仁新作《破浪男女》，也有點不知所謂（我水平低，不懂欣賞），堂堂影帝拍套咁款嘅三級片，美其名探究人性，但實際也是販賣裸露、性虐待與都市人約炮肉慾。

翌日改睇《武替道》，初見片名，覺得不倫不類，唔知係乜？加上董瑋做主角，喂，長者咾喎，以前最勁做武指，今次做男主角，有乜好睇呢？

還是家中老婆大人犀利，也是影迷，兼掌握為夫喜好，早早推薦：「肥碌，睇啦，啱你㗎，快啲入場！」聽老婆話會發達，即去！

哎吔吔，好彩即睇，果然屬近期最精彩一部！此片絕對有機來年《香港電影金像獎》掃幾個獎，尤其最佳男主角及武術設計。

算我走眼，原來董瑋演技如此出色，戲中扮演沉迷於完美主義的動作導演（其實係佢真人），在上世紀80年代科技未出現時，靠真人血肉長城設計出驚人的動作。為達目的，不擇手段又哄又逼又罵，總之要龍虎武師完成難度極高又危險的動作；若不滿意，懶理別人血肉之軀，打完又打，跳完又跳，撻完又撻，總之未到一百分絕不收貨，於是，不少旗下武師就因此而變傷殘。

真唔真？大家若上世紀80年代有睇成龍電影，套套出字幕時都附送蝦碌片段，不少武師真的拍到跌斷骨或被燒傷，甚或變傷殘，全部屬香港武打片時代的血淚史。

此片對一個「瘋狂」武術指導的描寫，刻劃入微，而董瑋肯定正在演半個自己，昔日真曾為電影拍得完美，犧牲兄弟，犧牲家庭，犧牲埋自己的人生，極之發人深省。

重要的事說三次——入場、入場、入場，瞓身推薦！