【曾智華專欄】馬季初兩大反高潮

馬季一開，最大反高潮有兩個：一為靚女見習練師黃寶妮，首次出賽即殺入冷位第三，立時被捧到上天。可惜第二次再出食足七場白果（全部正常賽果），結果班儍吓儍吓亂追捧者輸甩褲，老羞成怒在
網上狂插。大佬呀，你亂買亂捧，首先應插自己「有眼無珠」，為乜輸又唔認，打又唔企定咁冇品？

另一反高潮當然為「軟硬鞭」潘頓繼續隻手遮天，任開任玩。無法，騎功佢最高，加上霸晒好馬（當
然有因有果），馬迷買佢，W出肯定冇味，毫無興奮感；唔買佢又大鑊，分分鐘被佢篤爆。

講返明日賽事，季初難有高潮，平庸馬先出，大馬房用呢兩個月來掃馬，年紀大又冇乜前景的，安排出賽，得就得，唔得就大腳忽得，一係退役，一係掃走。

明天有場水波三級賽，睇見牌面都唔開胃，渣渣哋都叫「慶典盃」，竟只得六個馬房捧場，七隻馬恍如「阿叔競跑」，四隻6歲以上，乜潛質都見盡，唯獨「潮州精神」在上升中。

上仗「潮州精神」輕風送爽勝近兩馬位，被重手加7分，立即再出，繼續跑千四米，必須睇住。

「神虎龍駒」最高分，此馬盛年已過，只可吼準在盃仔及一班賽發難，今次最多入位。

「威力奔騰」次高分，7歲老馬，上季經常入位而只W一場，今次又係二二三三。

最有機會威脅「潮州精神」為另一匹高分老馬，8歲的「健康愉快」，睇嚟想盡地一煲，然後退役。此馬去季初正是在千四米博得一W，之後全季遊馬河，唔退役又冇轉倉，應在羅富全心中仍有獎金贏。其他三匹，唔睇嘞。

總結，二重彩「潮州精神」複式膽拖「神虎龍駒」、「威力奔騰」及「健康愉快」。