專欄│賽馬角度看游泳

賽馬本身都是運動，不同運動之間，都有相似的地方，例如游水跑步都是鬥快，鬥時間的項目，若果用賽馬角度去看今屆奥運游泳項目，尤其銅牌得主何詩蓓在100米自由泳的遭遇又幾得意。

今屆巴黎泳池只是一個臨時改建的泳池，早前Taylor Swift仲喺度開演唱會，所以池深只得2.15米，比一般3米深的所謂「正常深度」淺了接近1米。

這個因素極可能是今屆所有項目時間變得極慢的原因，至今只有一個世界紀錄由中國的潘展樂所創，遠比過去3屆數字低。其中蛙式的時間受影響最大，100米決賽中，全部泳手所造時間比平時慢兩秒。

平時賽馬，場地偏慢，好多時利後上，在何詩蓓100米決賽前，今屆游泳項目亦只得法國「水中麥巴比」馬查特可以自己由頭帶到尾大勝，其餘無一隻放頭贏，出現明顯不利放的「跑法偏差」。

何詩蓓一向慣常的放頭，而在100米準決賽和決賽，未知是否教練有睇開「贏跑台」知道臨場場地偏差，她改以稍留鬥爆末段的方式游，方駿輝金句「均速轉後追，包你唔會衰」應驗，兩度反勝實力指標迪密斯。

另外，就是「不利場地偏差」，潘展樂初賽只得第13名，準決賽後講到初賽在第4線食咗一個大浪，成個人拉停，但準決賽在邊線則沒有，以第一時間入決賽。而咁啱，女子100自決賽反常地由外檔包Q亦是今屆的特別之處。馬高