【曾智華專欄】貴價水的韋伯倫效應

寫稿不時會有拋磚引玉效果，小弟在此塗鴉一番，想到就寫，絕少有乜學術性推論或研究，純粹以常識（Common Sense）落筆。

不過，間中就引來有識之士回應，好玩！

上周本欄出咗篇《天價買水者儍儍哋？》，間接結論是呼應消委會測試結果——其實貴價水與平價水，除價錢及包裝有分別，基本上冇乜唔同。

意即你以為用高價買樽「靚水」好巴閉，其實是消費儍佬。

不過，同一件事可以有不同角度睇，讀者Boris乃飽學之士，立即來函回應，充滿學術理論，好鬼正，一於公開「益」吓大家。

「碌Sir，好多人其實明知樽水實質冇乜分別，仍願意花更高價錢買貴水，這個可歸納一個經濟學領域中的韋伯倫效應（Veblen Effect）。」

首先介紹吓韋伯倫，全名Thorstein Veblen（1857年至1928年），美國著名經濟學家，畢生最著名研究為發現商品價格，並非單一由供求及產品質素而定。佢指出一個有趣現象，為某些商品越貴越多人追住買。例如歐洲名牌手袋、勞斯萊斯名車⋯⋯以至現代人人飲的樽裝水。買的人除衡量價錢及質素外，更會考慮到產品帶來的「炫耀性」，包括社會地位、個人品味及財富高低等。這些「炫耀性」產生的價值，往往大於商品本身的實用價值。

著名經濟學家張五常也曾指出，炫耀性商品並無違反基本經濟定律，因若將「炫耀消費」（Conspicious Consumption）化為經濟單位，就可計算出其價值。

例如一樽水，若出產商能製造出「炫耀價值」，這個價值就可加落水的銷售價值，隨時由兩蚊變二十蚊一支。這就是Vablen Effect了。

喜歡炫耀與崇拜名牌並無對錯，只是清醒的消費者，應該知道自己「買緊乜」。