【曾智華專欄】高鐵略欠基本公關

通關後，高鐵又再出現一票難求現象，證明這個服務非常受歡迎，也非常之有需要。
　　
點解？快及準！若果坐飛機，會因這樣那樣問題，又唔升得，又唔降得。遇上天氣不佳又或工業行動、員工換唔切班等等問題，必定Delay又Delay，甚至取消航班，真係閒過立秋！搭飛機，就要有心理準備遇上麻煩突發事件，故此，不少人若抱著食得鹹魚抵得渴心態去搭，就要買定保險矣。
　　
高鐵又如何？絕對可以撼低飛機，故此，愈來愈好生意，正常。不過，係咪真真又快又準咁堅？
　　
唔好彩，小弟上周就遇上「唔係咁快又準」遭遇，與高鐵狂賣的形象背道而馳。
　　
我成團人買齊票，下午三時三十分由廣州南返港，下午二時三十分坐定定，大安旨意下午四時三十分可抵港。
　　
點知，嘩嘩，唔係啩，起初航班牌打出延時，即係Delay啦。咁鬼好天，又唔聽見有乜大意外，整乜Delay呢？當然冇人解釋。
　　
旅行，最怕遇上計劃中的一切有差池，尤其半天吊狀況，實在令人不安、壞情緒！
　　
投訴無門問蒼天乎，唯有等啦。個幾鐘頭後，更大鑊，竟然打出「班次取消」。
　　
嘩嘩，咁就大件事嘞，成團人點返香港？咪話高鐵又快又準又舒服嘅咩吓？
　　
死火！點解冇人解釋乜原因，話取消就取消？然後又冇安排另調航班，又或派吓餐券安撫情緒，老奉就咁算數？大佬，唔多似樣喎。
　　
終於我哋團長「和哥」決定唔再戇居居等到天長地久，立即指示領隊到售票處退票回水，然後自己安排旅遊巴，兩程接駁返港。
　　
整件事，我真係唔知高鐵咁大間公司搞乜，冇向乘客道歉，冇安排其他班次或巴士，唔該大家「食自己」，係咪欠缺基本公關呢？