【黃庭桄專欄】好好瞓的電影

我到底看了一齣甚麼電影？觀眾評分是四粒半星（五粒星為最高分），幾篇影評都以幾百字去讚到天上有、地下無，令我決定點都要花一百零一分鐘，去看電影《日麗》（《Aftersun》）。
　　
電影的頭十五分鐘，沒有太多對白，只是淡淡然拍攝一個父親跟十一歲女兒蘇菲的度假生活。兩父女去到土耳其的度假村酒店，慶祝離婚爸爸的三十一歲生日。
　　
攝製隊相當慳皮，整齣電影就在酒店內取景，有時在房間影住蘇菲摺衫，一摺便幾十秒，唔知搞乜。一時影住爸爸在拆右手斷骨的石膏，又是拆成分鐘。
　　
還以為，平淡如水的情節，去到中段會出現高潮疊起，至少應該有幾幕感人位吧！但蘇格蘭導演的堅持不容睇小，他一於由頭淡到尾，貫徹極少對白的手法，節奏慢如蝸牛——一隻停在泥濘動也不動的蝸牛。
　　
頭半小時，我瞓了幾次，唯有靠不斷郁身郁勢，去令自己醒過來，也有一刻衝動想奪門離座，但我還是想看看咁多影評吹捧的藝術電影，會不會有神來之筆？於是我畀多一小時，去看葫蘆裏賣甚麼藥。
　　
但，我錯了！直到捱至出字幕一刻，我真的在心裏說了幾句「星星月亮太陽交叉」，然後怪責自己：「點解咁冇用，我完全唔知道睇咗啲乜嘢？」幸好我用右手拉住左手，否則割凳犯了刑事罪行便大鑊了。
　　
這樣的電影充滿藝術感覺，只怪我水平太低，完全沒資格去感受那份沉浸式的父女情，不過這齣電影也令我明白，原來影評多是鱔稿，信者自誤。