【曾智華專欄】巴西好手雞飛狗走

騎師受賄貪污、參與賭博、與外圍有聯繫、拉馬造馬⋯⋯乃全世界馬場皆有發生的事，見怪不怪，因為——冇至奇！

只因金錢的引誘太大了，所以，拉完一個又一個，坐（監）完一個又一個，以上情況仍會「生生不息」。以往如此，現在如此，將來也會如此。簡單，有錢的地方就有賊。金錢世界孕育騙子，乃「永恆真理」。

故此，當上周爆出波健士及蘇兆輝涉賭，大家不會很驚奇，只會以「哈哈，又捉到兩個噃」的獵奇心態觀之。

稍稍「奇」的，為點解又係巴西佬？因為嗰頭剛剛莫雷拉神神秘秘稱傷告退，改玩「周遊列國」策騎外，鄉里馬雅又話拜拜。然後最新一對巴西孖寶斷正，真係⋯⋯有冇咁巧合呀老友？
　　
綜合小弟各線路人馬睇法：

一、波健士根本鄉下仔一名，也不擅英語，交際圈子甚細，易受擺布。最儍係佢完全唔知馬會保安部的「神通廣大」，竟敢明目張膽下注。

二、波仔一定以為「競駿光輝」上鋪沙田馬場百幾倍爆大冷，在自己胯下跑第二，今次應該第一喇啩？其實上鋪入Q，今次仍有十八倍，即係「冇飛」啦，正懵仔。

三、隻馬佢偷偷落咗注，再自己騎都跑到一坺咁，輸幾個馬位，證明眼光及騎功皆屎到痹。

四、本來波仔生生性性，間中會有練馬師畀馬佢爆，例如蔡約翰就久不久來次「波蔡」組合殺馬，如今冇呢支歌仔唱嘞。

五、上周五各馬房倒瀉籮蟹換騎師，所以「騎師王」開唔到盤。奇在「練馬師王」照開，難道馬會操盤手認為邊個跑，賽果都一樣？有趣！
　　
今晚二班千二米，「嫡愛心」熱晒，我輕注「巴薩諾瓦」撼低佢，大馬主蕭氏家族揀手貨，外地四戰三W一Q，勁嘢！