【曾智華專欄】可否洗牙「罰款」代替？

朋友之中，談到打針，十個有九個都怕。我又怕唔怕？當然怕！但當無法避免時，就要頂硬上。因為每年最少抽兩次血檢驗，此外，又要打這樣那樣的疫苗。
　　
不過，比打針更怕的是見牙醫，因為凡坐上佢張椅，就似上行刑電椅，因一連串酷刑，多會即將展開！
　　
小弟遇上人生最大鑊、最沒齒難忘、最劇痛一次，為十多年前，因有隻蛀牙，排期去睇政府醫生。
　　
眾所周知，政府牙醫十之七八新仔新女，全部畢業冇幾耐之新手，當然唔會熟練。
　　
醫生仔問我：「先生，你有蛀牙要補，要先磨開個窿，然後填水銀。你想唔想打麻醉針？」
　　
第一次畀人咁問，懵吓懵吓答返佢：「咁呀，打同唔打有乜分別呢醫生？」
　　
「哦⋯⋯唔係個個都想打嘅，有啲人寧願忍痛，避開麻醉針痛，到底麻藥都會有點副作用。」佢木口木面答。
　　
「咁唔打嘞！」呢句說話一出，真係駟馬難追！佢立即開動電鑽，飛快向我個牙窿大力鑽。
　　
大家試試想像，隻牙被蛀已經痛，而內裏又藏咗咁多神經線，如大力鑽落去，會有幾大生理震撼呢？
　　
事後與試過想順產又出唔到BB的前孕婦分享，這正是人生之最慘烈的「十級痛」。
　　
冇誇張，真係痛到標汗又標尿咁滯。不過，既已上電椅，難道選擇逃亡咁衰仔咩？
　　
自此有教訓。有機會打麻醉針的話，幾大主動提出要求！另外，那次經驗也令我產生先天性「牙醫恐懼症」，每次坐上電動椅，就會極度不安。
　　
昨天再到期洗牙，又係牙醫開動吱吱聲唔知電磨定電鑽，搞到我又赤又痛。佢一邊開工，我個心就一邊自己問自己：「哈，究竟呢種酷刑，可否用『罰款』來代替的呢？」