【曾智華專欄】某人被鬧到反肚

邊個畀人鬧到反肚？被鬧的，不但一啲都唔嬲，兼且笑到見牙唔見眼，掩嘴狂笑！

未講邊個之前，講講今季打吡大賽。馬迷十個有九個中唔到Q、二重彩、三重彩及四重彩（Q派1,940元，二重彩派5,908元，三重彩派18,580元，四重彩更驚人，派489,899元）。

三、四重彩是否很難中？理論上唔係，因為小弟一類資深馬迷，早就知道呢場大賽「蔡氏宗親會」出五隻，絕對操控大局。

結果正正三重彩佔兩隻，四重彩更佔三隻！咁點解冇人能中到正？因為W出的一隻，爆超級大冷，乃四十六倍的「遨遊氣泡」。

呢場馬係冇得唔服姚本輝的部署及巴度的演繹，此馬本來是放頭馬，次次贏皆如此。好啦，基於今場排十四檔，喂，邊有可能放頭呢？

放頭馬不能放頭，即係輸咗九成！

理論上，當然如此。不過，開閘！喂喂，乜「遨遊氣泡」竟然留住唔放，將長力於中段才使出，到最後五十米，爆到盡，擒下兩大高手莫雅的「自勝者強」及潘頓的「永遠美麗」。

呢場「蔡氏宗親會」一定嘔血，因為本來設計，W、P、Q、PQ，再二、三重彩，全部𡁻埋的，如今竟冷不提防畀一隻賽前冇人睇好的大冷殺晒，呆咗！

結果呢場W出的練馬師姚本輝就「屋企人有難」，因為賽後畀無數圈外人M到反肚。點解？因為佢賽前發放的馬房貼士，竟然提都唔提「遨遊氣泡」，咁⋯⋯即係點先？當然畀人鬧又好，笑又好——喂，使唔使咁收埋食呀，衰仔！不過，輝哥當然笑住收晒，因賺咗N百萬元啊！

今晚又玩快活谷。我好想睇潘頓點演繹「前死敵」韋達（做騎師時）彈畀佢的「宜春輝煌」及「電氣騎士」，兩皆特擅千二米，但抽十一檔，考牌也！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。