【曾智華專欄】「美麗」只可由天定

元旦日大賽之前，全港馬評人、馬迷，以至幕後人，十之九九認為當日有兩匹馬冇得輸，分別為準短途馬王「金鑽貴人」及巨星級馬「永遠美麗」，隔夜飛已盡顯信心，前者一點六倍，後者更誇張，一點三倍。
　　
點解「永遠美麗」熱成咁？乃因馬超晒班外，美麗系郭家有大喜事，馬主之一郭浩泉去年底迎娶美麗太太江鈺琪，故刻意安排「永遠美麗」元旦日出賽，以示喜事重重也。
　　
結果又如何？無法解釋的事發生，馬匹突於入閘前拋下騎師潘頓走甩，耗去大量體能。如此情況，為公平起見，當然要勒令退出，認真反高潮。
　　
又再應驗——人算不如天算。
　　
幸而美麗系多的是靚馬，次次賽馬日都有馬出賽，呢呢，周三又有喇，包括「美麗滿滿」、「美麗攻略」、「美麗新星」及「美麗奔馳」，隨時可能失之東隅，收之桑榆！

講起美麗系馬，小弟非常好奇，佢哋究竟擁有過幾多匹呢（現役及退役）？究竟用咗幾多錢購買馬匹呢（肯定天文數字）？每個月的養馬費又有幾龐大呢？
　　
所有數據，一按入馬會資料庫，立即有齊！原來郭氏家庭共擁有現役及退役馬幾十匹，若一匹馬價二百多萬元，最少用了過億元買馬！
　　
養馬費方面，若一匹每月六萬多元，也要用上一百多萬元！
　　
今晚美麗系有冇馬贏？又係由天定！我冇乜心水，反而有興趣研究四班一千米賽事。呢場肯定「威妙星」、「至尊高飛」及「快一步」熱晒，因由三大師傅策騎，再加埋靚檔。不過，點會三隻Do-Re-Mi咁返嚟吖？「跑馬」呀儍佬！我會用一隻冷冷哋的「心想事成」拖佢哋，買Q、PQ及二重彩。此馬排八檔，用冷門騎師馬雅，火燒唔熱，勝在近兩場一千米已入第三，快W喇老友！