武漢肺炎蔓延　視帝馬國明惠州登台煞停

原先麥玲玲和馬國明於農曆年到惠州登台，惜主辦方今日宣布取消！

武漢肺炎蔓延，直接影響娛樂圈藝人搵真銀機會，原先麥玲玲、劉鍚賢及視帝馬國明（馬明）分別喺年初一及年初二到惠州登台，但因安全問題臨時取消，主辦方考慮因應疫情狀況延期。採訪：方騫平

據悉，本來有香港旅行社組咗一個名為「男神駕到齊開年合家歡樂笑甜甜」嘅美食團前往惠州，包飲飲食食加睇騷，喺酒店宴會廳內舉行嘅晚會，仲請來出爐視帝馬明登台助慶！事前，馬明仲滿心歡喜諗住今年可以挾住聲勢發吓新年財，更揚言年初二返內地登台時，唔怕被傳染，繼續同觀眾握手打成一片，惜因密室內聚集的人流較多，主辦方今日決定取消，看狀況延期，雖然真係有點掃慶，不過都係以大家安全及健康為重。

此外，同一個主辦方稍後於3、4月份，亦邀請了「黑妹」李麗霞及李龍基去佛山登台，以及陳山聰和譚嘉儀去順德登台，但至今未知可有改動。

馬國明昨日仍於微博叫大家小心新型肺炎，仲祝大家身體健康。 「黑妹」李麗霞及李龍基稍後於3月亦會去佛山登台。 陳山聰和譚嘉儀則於4月去順德登台。