姜濤被「絕密牀照」屈請客

　　(星島日報報道)MIRROR昨日到澳門出席活動，預告將於5月再度開騷，但隊員踢爆姜濤對操肌及減肥只問不做，又笑言可用他的「絕密牀照」屈姜濤請食飯！

　　人氣男團MIRROR四位成員姜濤、陳卓賢（Ian）、楊樂文（Lokman）及江熚生（Anson Kong，AK）昨日到澳門出席品牌活動，吸引逾百「鏡粉」撐場，場面墟冚！

　　Lokman及AK預告MIRROR將於5月再度在九展開騷，希望不止開一場，甚至衝出香港。Ian則透露除了每日做Gym外，只食白烚雞肉及西蘭花，成功減掉4kg脂肪，亦已操出6塊腹肌，預告在新劇及演唱會「派福利」。

　　問到姜濤有否跟隊友去做Gym？他笑說：「睇到我臉上的瘡就知冇啦，哈哈！」眾人即踢爆他是「問題少年」，但只問不做，姜濤解釋說：「啲雞胸好貴呀！我先收集資料再算，但我有狂摸Ian的肌肉，哈哈！」他又指得到「叱咤生力軍銅獎」後狂食慶功，Ian破功食了一隻雞翼，自己只好代他多吃一點。

　　談到MIRROR成員在社交網站互放醜照，似是放下偶像包袱，AK預告還有更多勁爆照片，尤其是姜濤當年到美國集訓時着孖煙囪的嬌俏睡姿，絕對可以「老屈」他請食飯；姜濤聞言即哀求他不要公開，認真搞笑！

　　此外，有指因經理人花姐偏心MIRROR而壟斷ViuTV資源，花姐否認其事，並指MIRROR在劇組也曾試鏡失敗，綜藝節目也只得一個，屬公平競爭。